A Deputación de Pontevedra aprobou por unanimidade no Pleno celebrado este venres, unha moción presentada polo grupo provincial socialista para aprobar os compromisos políticos internacionais, co obxectivo de conseguir un balance cero de emisións de carbono nos próximos anos. Para iso débense abandonar, progresivamente, os combustibles fósiles.
Así mesmo, a Deputación sumouse ás mobilizacións en todo o mundo debido á marca de contaminación alcanzado na atmosfera terrestre no pasado mes de abril. Por esta razón, a presidenta da Administración provincial, Carmela Silva, xunto aos deputados dos tres grupos políticos integrantes da Corporación provincial e a persoas da institución, fixeron este venres un parón de 4 minutos e 15 segundos e apagaron as luces do Pazo Provincial.
A deputada Iria Lambas, en representación do PSdeG-PSOE, manifestou que "declarar a emerxencia climática require asumir o cumprimento de compromisos políticos reais e vinculantes, moito máis ambiciosos que os actuais". Ademais, destacou que "non podemos quedar de brazos cruzados", porque "vos efectos do cambio climático serán tamén locais" e "a subida dun só centímetro non nivel do mar implica a perda de moitos metros de praias en toda a provincia".
Lamas alertou sobre a posible desaparición do marisqueo, a chegada de especies tropicais e a proliferación de invasoras no territorio se non se frea o cambio climático. A deputada falou tamén sobre a problemática do plástico, que non só contamina os mares senón que xa está a afectar a saúde humana debido á cadea trófica. O Partido Popular, pola súa banda, manifestou que "frear o cambio climático debe ser unha prioridade".
