Case 100 mozos pediron participar no programa O teu primeiro emprego da Deputación de Pontevedra, ao que o ente destinou 2,6 millóns de euros para contratos laborais en prácticas en empresas e ONG.
Tal e como informou a institución nun comunicado, a través desta iniciativa, xa traballan 29 persoas na Deputación, outras 98 en concellos e, a partir de setembro, comezarán en empresas e organizacións non gobernamentais.
"Trátase dun programa que permite aos mozos con titulación universitaria ou ciclos formativos de grao superior ter a súa primeira experiencia profesional. O pasado ano conseguimos que o 25% dos mozos e mozas quedasen nas empresas e ONG cun contrato indefinido", explicou a presidenta da Deputación, Carmela Silva.
O programa conta con catro liñas de actuación independentes: O teu primeiro emprego na Deputación, O teu primeiro emprego nos concellos, O teu primeiro emprego nas empresas e corporacións sectoriais e O teu primeiro emprego en Organizacións non Gubernamentais.
O catro liñas, informou o organismo provincial, ofertan contratos en prácticas de até un ano de duración. Até agora están a traballar mozos na Deputación e en concellos, e a partir de setembro, será a quenda daqueles que vaian a empresas e ONG, xa escollidas. O ente provincial ten xa en marcha o proceso de selección dos mozos para optar a estes contratos.