Axentes da Garda Civil detiveron a tres homes de entre 18 e 37 anos de idade e identificaron a un menor, todos eles veciños de Vigo, como presuntos autores de, polo menos, tres delitos de roubo con forza.
As investigacións iniciáronse por mor da denuncia de varios roubos en distintos establecementos de Nigrán e O Porriño, informou o Instituto Armado.
As pescudas, levadas a cabo por axentes do posto de Baiona-Nigrán, centráronse en sospeitosos que tiñan antecedentes por feitos similares, e concluíron cando os axentes localizaron algúns dos obxectos roubados no domicilio dun deles.
Así, a Garda Civil atribúelles roubo de maquinaria, ferramentas e chatarra, durante o pasado mes de marzo, no Punto Limpo de Nigrán, nun taller de automoción deste municipio, e nunha nave dunha empresa de telecomunicacións do Porriño.
A operación pechouse coa recuperación de varios dos efectos subtraídos, que gardaba o menor no seu domicilio, así como dun martelo percutor que foi localizado nunha tenda de venda de obxectos de segunda man en Vigo.
As dilixencias foron postas a disposición do Xulgado de Instrución número 1 de Vigo e tamén se deu traslado á Fiscalía de Menores de Pontevedra.
