Sobre o papel, e nun plano puramente teórico, a nova regulación da tarifa eléctrica podería parecer que persegue un obxectivo beneficioso para a maioría, porque o Goberno central xustifícaa coa finalidade de que, na medida do posible, o consumo enerxético se desvíe cara a horarios nos que a demanda é habitualmente menor, e por esta razón o custo é moito máis baixo.
Que a demanda se concentrase uns tramos facía preciso dispor dunha infraestrutura potente e cunha alta capacidade de xeración eléctrica para poder responder. Existía unha tarifa, a nocturna e, sobre esa base, en moitos fogares adoptaron decisións, no seu momento, para que o consumo fose máis responsable.
Tendo en conta que este é o camiño, ao que se suma unha nova realidade, que a de utilizar outras alternativas á mobilidade convencional mediante carburante fósiles, como é o vehículo eléctrico, a realidade é que, dun día para outro se presenta un escenario, sen tempo para similar unha realidade que se aproximaba a raíz do impacto derivado da irrupción do coronavirus.
"NON PINTA BEN". "A teoría é facilmente vendible, pero a realidade é que a cousa non pinta ben por unha razón", e estriba en que "desde a Administración, os artífices dos cambios están a dicir que, nun principio, vai supor un aforro pequerrecho para un grupo de consumidores, os menos responsables, os que nunca adoptaron medidas de aforro ou de eficiencia", advirte o secretario xeral da Unión de Consumidores de Galicia, Miguel López.
"Pode agravar a situación das persoas que están en situación de pobreza enerxética"
O motivo é que é que ata a data os que estaban acollidos a unha tarifa básica sen discriminación, e pagaban toda a luz ao mesmo prezo; agora, sen facer practicamente nada o farán unha parte de 00.00 a 8.00 horas as fins de semana e os festivos, que lles sairá un 95% máis barata.
Pero a repercusión é mínima porque o descenso quedará compensado co "aumento brutal que vai ter nas horas punta do día, que son desde as dez da mañá ate as dúas da tarde e das seis da tarde ás dez da noite", subliña Miguel López.
Ademais, a nova distribución do horario provocará "que se multiplique o prezo que estamos a pagar moitas familias", apunta. O motivo é que nos tramos nos que o prezo é máis elevado é cando se realiza a maior parte da vida doméstica. "Cantas cousas non hai que facer antes das dez dá noite?", pregúntase. Bañar e deitar aos nenos, agrega, e precisa que forma parte dunha familia numerosa.
A nova distribución de horario provocará que se multiplique o prezo que estamos a pagar moitas familias"
"Por máis que nos diga o Goberno que temos que intentar trasladar o consumo, a realidade é que non imos poder aínda que queiramos", advirte o secretario xeral da Unión de Consumidores de Galicia.
A explicación é simple: para logralo sería necesario pasar o ferro de noite e pór a lavadora ou o lavalouzas nos horarios máis económicos. Pero quen pode facelo, o que vive nunha vivenda unifamiliar ou no rural terao máis fácil, "pero pregunta aos administradores de leiras que che din de poñer as lavadoras ou os lavavaixelas entre as doce da noite ás once da mañá", expón.
Tamén aconsellan facelo durante as fins de semana, e algunhas poderán facelo, pero a maioría non pode deixar esas tarefas para entón. "Algunhas, e dígocho por experiencia, temos que poñer ate dúas lavadoras no mesmo día", apunta. E de noite, as normas da comunidade de veciños impiden molestar aos veciños "coas lavadoras pululando pola placa de formigón".
O novo marco suporá que as familias que apostaron pola tarifa de discriminación horaria para pagar o menos posible e desviar o consumo ás horas de menor demanda "son os que máis van ser castigados", recalca Miguel López.
Agrega que é moi sinxelo expor unha hipótese de que pagarán ao redor de 20 e 40 euros máis ao ano, "pero é unha falacia total e absoluta", denuncia, porque da mesma forma que a Comisión Nacional de Mercados e da Competencia pode facer unha comparativa teórica, "eu podo facelo do meu e podo dicir que vou pagar máis dun vinte por cento a partires de día 1 de xuño. Vou pagar moitísimo máis cara a electricidade", que poden ser ata cen euros máis ao ano.
BENEFICIADOS. Quen serán os beneficiados son aqueles que ten máis capacidade económica e poden comprar un vehículo eléctrico ou un híbrido enchufable, porque poderán recargalo en horario nocturno e durante as fins de semana e contratar dous tramos diferentes.
"Quen vai poder reducir potencia durante o día se para moitos as necesidades de consumo non se poden deixar para outro momento?". Miguel López expón que situación é a que lle agarda a quen necesitan a calefacción, especialmente o colectivo da terceira idade. Fronte a un circuíto de gas natural, gasóleo ou as caldeiras de pellet, o radiador eléctrico é alcanzable. "Pode agravar a situación de persoas que están en situación de pobreza enerxética", subliña.
Tamén ten presente que os maiores se afixeron a deixar feitas as tarefas domésticas antes das doce ou a unha, porque comen cedo, cunha tarifa moi económica. Pero agora finaliza ás oito, e ás dez o intermedio, polo que terían que esperar ata as dúas da tarde.
