As estafas cometidas a través de tarxetas de crédito aumentaron un 114% na provincia de Pontevedra nos cinco primeiros meses deste ano con respecto ao mesmo período do pasado, segundo asegurou este venres a subdelegada do Goberno, Maica Larriba.
Larriba presidiu este venres a reunión da xunta provincial de seguridade, na que se analizaron os datos de criminalidade da provincia nos cinco primeiros meses de 2021. Os datos achegados polos corpos e forzas de seguridade do Estado mostran unha redución do 19% no roubo de vivendas, dun 60% nos cometidos en establecementos comerciais e dun 47% nos roubos con forza. Os delitos contra o patrimonio reducíronse un 5,5% e tamén baixaron os de lesións, nun 8%, segundo detallou Larriba tras a reunión.
Pola contra, xunto coas estafas a través de tarxetas de crédito, tamén se incrementaron os casos de malos tratos un 9,5% e os delitos contra a liberdade sexual. Nos primeiros cinco meses de 2021 rexistráronse cinco agresións, fronte ás tres denunciadas en 2020.
Sobre as estafas por internet, a subdelegada apuntou que este tipo de delitos rexístranse xa en todo o territorio, xa sexa rural ou núcleos urbanos, polo que apelou á concienciación social. "Debemos ser moi cautos e adoptar todas as medidas de seguridade posibles á hora de realizar compras por internet", subliñou.
Recordou que nunca se deben facilitar os datos persoais e bancarios en resposta a correos electrónicos, chamadas ou mensaxes e comprobar a dirección da páxina na que se realizan as compras. A ciberdelincuencia, segundo Larriba, adquiriu un "alto grao de especialización", o que obrigou os clientes a adoptar un comportamento "precavido" para evitar "sorpresas desagradables".
