O impacto da violencia machista en Pontevedra calculouse nuns 470 millóns de euros, e en aproximadamente 1.650 millóns en toda Galicia.
Son cifras que se desprenden do estudo Impacto da violencia de xénero en España durante 2016, que cuantificou en 23.000 millóns o gasto no conxunto do Estado.
Ademais, a provincia de Pontevedra é a única de Galicia onde se produciu unha morte por violencia machista no que levamos de ano
A subdelegada do Goberno en Pontevedra, Maica Larriba, fixo un chamamento á sociedade para "combater" esta "secuela" na provincia galega onde máis aumentaron as denuncias, con 592 casos.
"Non sei se é bo ou non tan bo", sinalou Larriba con motivo da presentación do estudo. "Significa que se denuncia e é algo do que sentirnos satisfeitos, pero tamén é un signo de que a violencia de xénero segue crecendo", engadiu.
Neste sentido, insistiu en dirixirse aos "que seguen vendendo ideas reaccionarias sobre que a violencia de xénero non existe" e enmárcana como "violencia doméstica que ten que ser soportada e resolta no seo das familias".
Tamén fixo extensiva a súa mensaxe a quen se deixan "seducir" pola formulación e "néganse a cualificar como tal as mortes por violencia de xénero" argumentando que "son unhas mortes máis".
Así, a provincia de Pontevedra é a única de Galicia onde se produciu unha morte -María José Aboy en Valga, o pasado mes de marzo- por violencia machista no que levamos de ano, ás que se suman outras 26 no resto de España, das cales "dúas están en estudo", explicou durante a presentación do estudo ante responsables da Garda Civil, a Policía Nacional, representantes municipais de Pontevedra, Poio e Cambados, e integrantes de diversos colectivos feministas da provincia.
Ademais, Maica Larriba precisou que na provincia de Pontevedra hai 1.058 casos activos de mulleres vítimas de violencia de xénero, un deles en situación de risco "extremo", sendo 67 as mulleres con ordes de protección, concretou sobre este triste "ranking".
"Sempre que teño oportunidade esixo, á conta de resultar moi pesada, o máximo esforzo para acabar con esta violencia", insistiu a subdelegada do Goberno en Pontevedra sobre os seus encontros con responsables tanto dos Corpos e Forzas de Seguridade do Estado como dos concellos.
Tamén asegurou que do presidente do Goberno, Pedro Sánchez, e os seus representantes na Administración do Estado están "envorcados" para que non haxa "nin unha menos", reiterando ás mulleres que padecen violencia machista que "teñen que saber que non están soas" e que "denuncien".
ESTUDO. Sobre o Impacto da violencia de xénero en España, María Debén explicou que o elaborou un equipo investigador dos departamentos de Economía Social e de Igualdade na Universidade de Alcalá.
Aínda que se trata dun estudo "estimativo" con datos "aproximados", a coordinadora de Igualdade da Delegación do Goberno en Galicia sinalou que "atendendo á contabilidade nacional parece que se corresponde coa realidade".
"É a primeira vez que se fai un estudo en España desta envergadura", destacou María Debén, que se suma a unha investigación similar a nivel europeo en 2012 e do que tamén hai constancia noutros países como Canadá e Australia.
"Achega un dato paralelo e próximo ao que deu a Unión Europea acerca de que a violencia de xénero ocasiona un custo similar ao 0,8 por cento do Produto Interior Bruto do país".
Os 23.000 millóns de euros que supón a violencia machista ao erario público español resultaron de analizar "o custo dinerario para as vítimas e as súas familias, e para toda a sociedade, desde o punto de vista laboral, sanitario e legal", con aspectos que recollen a atención ás mulleres que a sofren, os enterros daquelas que foron asasinadas ou as suplencias en caso de baixa laboral por razóns sanitarias.
"Tamén cuantifica o intanxible, como a dor, o sufrimento e a perda de vidas humanas incluso dos agresores, cando se produce o suicidio posterior", engadiu María Debén.
"A sociedade ten que valorar ata que punto estamos a dedicar un importante paquete de recursos públicos á loita contra a violencia de xénero", concluíu a coordinadora de Igualdade, advertindo que nos afecta a todos e todos somos responsables de pór en marcha medidas para evitala".
