Unha saída de vía saldouse cunha persoa ferida cando circulaba co seu vehículo pola PO-552, no punto quilométrico 71, ao seu paso polo concello pontevedrés de Tui.
O accidente tivo lugar ás tres desta tarde. Nese momento, o 112 Galicia recibiu a chamada de varios particulares que alertaban dun vehículo que sufrira unha saída vía na estrada que une as localidades de Tui e A Guarda. Ademais, indicaban que a persoa ferida, única ocupante do turismo, podería estar atrapada no seu interior.
Decontado, desde Emerxencias 112 Galicia púxose a situación en coñecemento dos profesionais de Urxencias Sanitarias de Galicia-061, dos Bombeiros de Baixo Miño e dos axentes de Tráfico e Policía Local e de Protección Civil da vila.
Xa no lugar, os servizos de emerxencia fixeron uso do material de excarceración para liberar a persoa afectada para, finalmente, ser evacuada polo persoal sanitario ao centro hospitalario de referencia.
