Dúas persoas necesitaron asistencia médica despois de que un coche chocase contra outro vehículo que envorcou na autovía A-52, ao seu paso polo municipio de Ponteareas.
Segundo informou o 112 Galicia, os feitos producíronse no punto quilométrico 291 da autovía A-52, en sentido Ourense, preto das 20.00 horas deste martes.
Varias persoas particulares contactaron co 112 Galicia para alertar dun coche que envorcara nese lugar da autovía e, posteriormente, avisaron da colisión doutro turismo contra o primeiro vehículo accidentado.
Tras ter coñecemento da situación, o persoal do Centro Integrado de Atención ás Emerxencias (CIAE) 112 solicitou a intervención de Urxencias Sanitarias de Galicia-061, da Garda Civil de Tráfico, dos GES e Bombeiros de Ponteareas, da Policía Local, dos membros da Agrupación de Voluntarios de Protección Civil da localidade e do servizo de mantemento da vía de circulación.
No lugar dos feitos e unha vez atendidas as persoas que circulaban nos dous vehículos accidentados, os efectivos do GES-SPEIS Ponteareas confirmaron ao 112 Galicia que ambos foran retirados da autovía mediante un guindastre.
