A Fiscalía coincidiu na súa valoración cos avogados que representan os dous falecidos e o ferido máis grave e reclamará catro anos de prisión e seis de retirada do carné de conducir para o nonaxenario que, o 12 de marzo de 2016, atropelou a un grupo de catorce ciclistas que pedaleaban pola PO-552 na Guarda, nun accidente que deixou dous mortos e outros nove feridos. Así mesmo, solicita que desembolse máis de 2,3 millóns de euros de indemnización aos afectados.
O ministerio fiscal considera xa que logo a Manuel Benito A.L. autor de dous delitos de homicidio e outros sete de lesións, ambos por imprudencia grave. Responsabiliza ao ancián de provocar o suceso cando circulaba distraído co seu todoterreo e a máis velocidade da permitida. Do montante das indemnizacións, que non abarca o xa percibido pola familia dun dos falecidos e un dos lesionados, hai que descontar os outros pagos efectuados polo seguro do condutor ás vítimas. O longo proceso de recuperación dalgunhas delas foi unha das causas da dilación no cálculo desta sanción.
Deste xeito, o xuízo oral por esta causa queda así pendente do escrito que presente o avogado do investigado.
