O 112 Galicia rexistrou na mañá deste sábado dous accidentes de tráfico en Pontevedra nos que foi necesaria a intervención dos bombeiros para liberar a outros tantos condutores atrapados nos seus vehículos. Tiveron lugar en Mos e na Guarda.
En concreto, preto das 12.00 horas, un vehículo que circulaba pola Rúa Bechos da Guarda saíu da estrada e chocou contra un turismo que se atopaba estacionado. Como consecuencia do impacto, o coche envorcou e o home que viaxaba no interior necesitou da axuda dos efectivos de urxencias para poder saír. No operativo participaron membros do GES da localidade, así como da Policía Local e do 061, que trasladou a un centro hospitalario á vítima.
Uns minutos máis tarde, outro vehículo, neste caso un camión, envorcou na parroquia mosense de Sanguiñeda. Para poder liberar ao condutor, acudiron ao lugar do accidente os Bombeiros do Baixo Miño. Posteriormente, o ferido foi atendido por un equipo médico.
