O vicepresidente da Deputación de Pontevedra, o nacionalista César Mosquera, garantiu que o BNG e o PSOE pactarán para garantir que a socialista Carmela Silva repita como presidenta da institución provincial, pero indicou que aínda "quedan por afinar" os detalles dese acordo.
"Vai haber pacto seguro", anunciou César Mosquera antes de engadir que "o que está por afinar" é se este acordo é "de investidura, de mandato ou de goberno de coalición".
Mosquera fixo estas declaracións este venres logo de participar no último pleno do actual mandato na Deputación de Pontevedra.
O portavoz do grupo provincial do Bloque leva persoalmente as negociacións con David Regades, secretario provincial do PSOE, que é o seu interlocutor pola parte socialista.
Como anécdota César Mosquera comentou que as negociacións entre eles non só están a ser presenciais senón que están a utilizar outros medios como os correos electrónicos ou o intercambio de WhatsApp.
Mosquera descartou que ese acordo vaia estar condicionado pola situación que está a vivir o BNG en Vigo onde a formación nacionalista obtivo un só concelleiro e o PSOE, que goberna con maioría absoluta de 20 dos 27 concelleiros, propuxo que non teña grupo propio, senón que pase ao grupo mixto.
César Mosquera comprende o "desgusto" dos seus compañeiros de Vigo, pero apuntou que esa situación "non vai condicionar para nada" ao futuro pacto.
