A Garda Civil detivo 120 persoas nunha macrooperación internacional contra a fraude na alimentación con conexións en Pontevedra, onde foron detidas oito persoas acusadas de formar parte da "maior rede mundial de comercio de moluscos bivalvos non aptos para o consumo humano", informa o instituto armado.
En canto á parte pontevedresa da trama, o corpo informa de que, ademais dos oito arrestos, hai sete sociedades mercantís investigadas e foron comisados 120.000 euros en metálico, ademais de 25 vehículos, algúns de alta gama, igual que as doce embarcacións que foron incautadas. Participaron neste dispositivo a Xefatura do Seprona e a Unidade Orgánica de Policía Xudicial da Garda Civil de Pontevedra, en Coordinación coa GNR de Portugal.
Respecto ao resto da operación, foi realizada en diversos puntos de España e tamén do estranxeiro. Nas infraccións penais detectáronse varios modus operandi, desde a falsificación de documentos para a importación de alcois adulterados ata a fraude en precintos dos propios envases, o que leva a pensar nunha orixe ilícita. Destacan as 25.000 botellas de viño comisadas en rexións vitivinícolas que ían poñer no mercado produtores ilegais.