Os grupos de PSdeG, GañaMos e BNG do Concello de Mos decidiron conxuntamente non asistir ao pleno extraordinario convocado para este martes pola alcaldesa, a popular Nidia Arévalo, que consideran unha "farsa" e que tiña como único punto da orde do día a emisión masiva de facturas falsas da auga. "Non imos colaborar coa farsa do xuízo paralelo impulsado desde o goberno do PP", dixeron os grupos da oposición.
Estes critican a actitude da alcaldesa durante as últimas semanas, nas que acusou a GañaMos e a unha comunidade de montes de estar detrás dunha suposta trama de envío masivo de falsos recibos da auga aos veciños de Mos para descabalgala da alcaldía.
O asunto está en mans da Xustiza, que investiga a dúas persoas como responsables do envío de 500 facturas seladas falsamente polo Concello e a Xunta e a nome dunha empresa inexistente por importes de entre 200 e 440 euros.
A oposición considera que as acusacións da alcaldesa estiveron "absolutamente fóra de lugar", e que "non estivo á altura da súa posición institucional" cando deu nomes concretos habendo unha investigación en curso, primeira das razóns que alegaron para ausentarse do pleno.
Os tres partidos da oposición sinalan, ademais, que a denuncia sobre as supostas facturas falsas púxoa Nidia Arévalo a título particular e non o Concello de Mos como institución, e que ningún dos grupos recibiu información ou comunicación ningunha.
Por todo o anterior, a oposición entende que a convocatoria dun pleno extraordinario non está xustificada "máis aló da intención do PP de acaparar a atención mediática", máis aínda cando se convoca a só 13 días de que se celebre a sesión ordinaria do mes de xullo.
"O pleno extraordinario é un capítulo máis do espectáculo mediático que está a montar o PP, un show no que tivemos que presenciar escenas verdadeiramente vergonzantes. A actitude victimista que está a exhibir Nidia Arévalo é impropia dunha alcaldía", esgrimen os grupos da oposición nun comunicado.
Os catro puntos da orde do día saíron adiante cos únicos votos do PP, que ostenta a maioría absoluta en Mos. Estes son a ratificación do pleno da denuncia pola suposta trama de emisión destes falsos recibos da auga; a destitución da xunta directiva da comunidade de Tameiga; a dimisión do portavoz de GañaMos, Román González, e que PSOE e BNG condenen publicamente esta actuación.
No texto das mocións figura que das vivendas do presidente da comunidade de montes de Tameiga partiron os recibos falsos emitidos; que o seu coordinador, Gonzalo Pérez, ordenou o envío das 4.000 cartas a través da oficina de Correos, e que o empregado Carlos Roca levounas alí por orde daquel.
En canto á petición do portavoz de GañaMos, esgrime o goberno local que é "o brazo político" desta comunidade de montes e que levou de número oito na súa lista electoral a Gonzalo Pérez, ademais do feito de que "acusou falsamente" á alcaldesa de facer "unha montaxe".
