Ponte Caldelas adquire material para elaborar 6.000 máscaras

Distintos municipios pontevedreses e do resto de Galicia continuaron este martes elaborando, encargando e repartindo a veciños e traballadores de servizos esenciais máscaras de protección contra o Covid-19.

É o caso de Ponte Caldelas, o Concello adquiriu materiais homologados para elaborar 6.000 máscaras que se entregarán gratuitamente aos veciños nos seus domicilios.

Estes produtos de seguridade serán confeccionados polas persoas voluntarias que se ofreceron e que deben cumprir pautas hixiénicas, como a desinfección das máquinas de coser, e estarán realizados con tea TNT, indicada para a confección de máscaras sanitarias, ademais de incorporar un filtro no seu interior para maior protección.

Tamén en Caldas de Reis recibiuse este martes a doazón, por parte da farmacia local, de material para a confección de 2.000 máscaras hixiénicas, que serán elaboradas por costureros e costureras voluntarias nun prazo de 15 días e distribuídos posteriormente, dando prioridade aos colectivos máis vulnerables, servizos públicos e comercios.