Ponte Caldelas e Moraña gardan os manteis e Cambados desempóaos

Seis concellos da área sanitaria víronse afectados polo último reaxuste nos niveis de restricións e, como un pode presumir, cada quen avalía o cambio desde a súa propia perspectiva. Os que alixeiran o peso das medidas anticovid móstranse esperanzados por poder dar un paso máis cara á normalidade pandémica, mentres que os que ven obrigados a encorsetar a actividade socioeconómica non esconden as súas ganas de recuperar o status previo.

Neste último bloque atópanse os concellos de Ponte Caldelas e Moraña, que desde esta madrugada están afectados o nivel alto de restricións. Esta fase suspende o servizo en interiores dos negocios de restauración e caeu como un xerro de auga fría na hostalería de ambos os municipios, onde custa asumir o feito de ter que volver gardar os manteis ante unhas cifras aparentemente contidas. O concello caldense leva tres días ancorado nos 15 casos activos e Moraña conta con 14 (un máis dos que constaban o xoves). O gran problema de ambos os municipios é a incidencia acumulada, que se situou entre os 250 e 500 casos por cada 100.000 habitantes a 14 días, unha taxa que practicamente ao nivel alto de restricións. Ademais, segundo engade Sanidade no DOG (Diario Oficial de Galicia) publicado este venres, o comité de expertos aconsellou endurecer as limitacións pola existencia de casos "sen vínculo epidemiolóxico" que non están asociados aos brotes localizados.

Andrés Díaz, alcalde de Ponte Caldelas: "Agardo que a situación se estabilice e só teñamos que estar neste nivel unha semana ou o menor tempo posible" 

NIVEL ALTO. O alcalde de Ponte Caldelas, Andrés Díaz, era dos que xa prognosticaba a subida ao nivel alto "dado o incremento de nivel de casos". O que espera agora é que a situación se estabilice" e sexa fugaz, "que só teñamos que situarnos neste nivel durante unha semana ou o menor tempo posible", indicou este venres. 

O socialista subliñou que a hostalaría local "volve a resentirse coas restriccións que se lle impoñen dende a Xunta", e insistiu en que os casos activos "están controlados". En gran parte, grazas ao cribado realizado hai uns días, que permitiu detectar a persoas "asintomáticas que podían estar contaxiando sen sabelo". 

Pola súa banda, o alcalde de Moraña, José Cela, incidiu en que o cambio de nivel "nos preocupa". Por unha banda, porque o concello aínda está lonxe do pico de 60 casos que rexistrou hai uns meses, pero a curva leva uns días "subindo", alimentando a incerteza. E por outro, porque as limitacións de aforamento golpean á hostalería, "que non é que sexa o sector máis importante do concello, pero si un importante elemento dinamizador. A xente de paso que vén pola hostalaría accede aos comercios e viceversa. É un medio de vida para un grupo de familias moi importante e está a sufrir moito", advertiu o rexedor.

José Cela, alcalde de Moraña: "A hostalaría é un medio de vida para un grupo de familias moi importante e está a sufrir moito" 

Vilanova de Arousa continúa nese mesmo nivel alto de restricións, ao que descendeu o concello de Cambados. Neste caso, a evolución foi á inversa e de superar os 500 casos por cada 100.000 habitantes a 14 días, situouse na franxa dos 250-500.

A alcaldesa de Cambados, Fátima Abal, reiterou o venres a eficacia do nivel máximo de restricións, que implica o peche perimetral e o peche ao público dos locais hostaleiros (onde só se permite o servizo a domicilio), pero sen esconder a satisfacción por poder levantar barreiras: "A verdade é que era unha noticia moi esperada", sinalou. O concello levaba confinado desde o 7 de maio.

Abal espera poder seguir banzos para que a hostalaría poida funcionar en interior e que os veciños ingresados no hospital "reciban a alta canto antes". O único que pide é "responsabilidade individual, que se non fagan reunións de non convivintes en número excesivo e síganse usando máscara en todos os ámbitos posibles". O total de activos subiu en tres casos.

Fátima Abal, alcaldesa de Cambados: "Pido responsabilidade individual, que non se fagan reunións en número excesivo e se use máscara en todos os ámbitos" 

NIVEL MEDIO. Pola súa banda, Bueu continúa no nivel medio de restricións, no que tamén seguirán ata a próxima semana Cerdedo-Cotobade e Cuntis.

O alcalde do concello budetense esperaba "baixar ao nivel medio-baixo" pola mellora das cifras epidemiolóxicas, pero finalmente debe seguir coas súas terrazas ao 50% e o interior dos locais ao 30%. O xerente da Área Sanitaria trasladoulle que hai que "manter a prudencia" e, aínda que existe preocupación pola incidencia de todo isto "no comercio e a hostalaría", Juncal confía en regresar ao nivel básico, como fixeron facer Marín e Soutomaior.

Félix Juncal, alcalde de Bueu: "Estamos preocupados pola incidencia no comercio e a hostalaría, pois ao estar en nivel medio ven reducida a ocupación"