A provincia de Pontevedra rexistrou no mes de agosto unha ocupación media do 83%, segundo os datos ofrecidos este venres en rolda de prensa pola presidenta da Deputación, Carmela Silva, que os cualificou como "moi positivos". "Novamente, a nosa provincia volve situarse como o puntal turístico de Galicia", valorou a mandataria socialista.
Carmela Silva recordou que "as previsións eran máis pesimistas debido á mala climatoloxía" e sinalou que os informes de Meteogalicia confirman que este mes de agosto foi o segundo mes coa temperatura media máis baixa da década e con precipitacións que o sitúan como o agosto máis húmido do último lustro.
En canto aos datos por comarcas, a do Salnés obtivo unha ocupación media do 88%, destacando as localidades de Sanxenxo, cun 90%, e O Grove, cun 86%.
Na comarca de Pontevedra a media foi "magnífica", do 86%, que na capital superouse ao 87%. O Morrazo alcanzou tamén un "gran resultado" cun 86%, e na comarca de Caldas a ocupación media foi do 76%.
Carmela Silva destacou que estes datos "da máxima fiabilidade" foron recollidos pola empresa Estratexia Plus S.L.
Na comarca de Vigo, pola súa banda, a ocupación foi do 87%, destacando Baiona cun 90% e a cidade olívica cun 88% e no fin de semana do Marisquiño chegou ao 100% "con repercusión en toda a comarca". En Baixo Miño a media foi do 87%, no Condado-Paradanta un 74% e en Deza-Tabeirós-Terra de Montes un 79%.
Carmela Silva destacou que estes datos "da máxima fiabilidade" foron recollidos pola empresa Estratexia Plus S.L. "mediante enquisas realizadas con rigor e que teñen un nivel de confianza do 95%". Esta empresa, con sede en Pontevedra, obtivo a concesión deste servizo a través dun concurso público.
TURISMO RURAL. En canto aos datos de ocupación rexistrados no sector do Turismo Rural, os resultados foron tamén "excelentes", destacou Carmela Silva, que cifrou nun 84% a ocupación media en toda a provincia durante o mes de agosto.
Pontevedra foi a terceira provincia española cunha maior ocupación en casas rurais, logo de Málaga e Cádiz, segundo o dato da web escapadarural.com pola Deputación.
Albérguelos tiveron unha ocupación "moi relevante" do 85%
Tamén os albergues tiveron unha ocupación "moi relevante" do 85%, a media de agosto dos cámpings foi do 75% e os castelos de Soutomaior e Sobroso sumaron 9.217 visitantes no mes de agosto.
Carmela Silva tamén se fixo eco dos datos que a Asociación de Vivendas Turísticas de Galicia (AVITURGA) ofrece respecto de destinos de costa como Sanxenxo, Cambados, Vigo, Pontevedra, Poio, Nigrán e O Grove, onde se conseguiu o 100%.
PERFIL. Atendendo aos datos recollidos polo persoal das oficinas de información turística da Deputación de Pontevedra, o perfil dos visitantes que acudiron ás Rías Baixas durante o mes de agosto é maioritariamente nacional, un 85%, destacando os procedentes de Madrid, Barcelona, Biscaia, Valencia e Valladolid. En canto ao 15% de estranxeiros, chegou fundamentalmente de Francia, Reino Unido, Italia, Alemaña e Portugal.
As idades sitúanse entre os 35 e 60 anos, alóxanse en hoteis entre 7 e 15 días, principalmente en Vigo, Pontevedra, Sanxenxo, O Grove e Poio, e chegan á provincia por cuestións relacionadas coa cultura e o lecer-natureza.
Finalmente, a presidenta da Deputación de Pontevedra, Carmela Silva, ofreceu as estimacións de ocupación que manexa Turismo Rías Baixas para este mes de setembro, atendendo ás informacións que traslada o sector e que sitúan o dato medio no 51%. "Sempre somos moi comedidos nas estimacións" puntualizou Carmela Silva.
