A deputada do PP no Congreso Pilar Rojo instou ao Ministerio de Fomento a explicar cales son os seus plans sobre o proxecto da subestación para Adif na parroquia de Bértola, no municipio pontevedrés de Vilaboa. Nunha iniciativa rexistrada na mesa da Cámara, a parlamentaria pregunta "se o proxecto está totalmente rexeitado ou se, ao contrario, esperarán a que se resolva o contencioso-administrativo no que está inmersa a autorización". Ademais, tamén se interesa por se "se estudou ou se valorará algunha outra localización de acordo co solicitado polos veciños".
Nun comunicado, o PP recorda que nunha reunión mantida cos deputados autonómicos Jacobo Moreira e Alberto Pazos, os veciños da parroquia de Bértola mostraron a súa "preocupación" ante a "posibilidade de que Fomento estivese a valorar reactivar o proxecto da subestación que Adif expuxo para esta parroquia". Respecto diso, o candidato do PP á Alcaldía de Vilaboa, Alberto Acuña, mostrou o apoio da formación á postura defendida polos veciños que, segundo os populares, opinan que esta instalación é "innecesaria".
