O proxecto para o fomento do uso da bicicleta desenvolvido pola Deputación de Pontevedra foi recoñecido co premio Bikefriendly 2021, que outorga a Rede de Cidades pola bicicleta.
O galardón foi a parar ao organismo provincial na categoría de Liderado e Compromiso en recoñecemento do mellor proxecto para o impulso da bicicleta como medio de transporte urbano.
A organización dos premios, segundo sinala a deputación que preside Carmela Silva, valorou o esforzo da institución para "deseñar e desenvolver instrumentos orientados a impulsar, coordinar e avaliar accións orientadas a fomentar o uso da bicicleta nos seus territorios".
O deputado provincial Uxío Benítez mostrou a súa satisfacción polo premio a unha iniciativa que xorde de Ágora, un proxecto "que aínda ten moito percorrido por desenvolver".