Un produto insecticida para matar abellas supostamente foi a orixe dun incendio na parte alta dunha casa no municipio pontevedrés da Cañiza, que se saldou sen feridos na noite deste pasado mércores.
Segundo informou o 112 Galicia, este lume nunha vivenda da Cañiza deixou parte da zona alta da casa queimada, pero non houbo danos persoais. Foi un particular quen, case ás 23,00 horas, comunicoulle ao servizo de urxencias que saía moito fume negro dun domicilio da parroquia da Franqueira.
O alertante asegurou que, neses momentos, xa estaban todos os inquilinos fóra da vivenda e que eles mesmos intentaban sufocar as chamas cunha mangueira.
Con estes datos, por parte do CIAE-112 Galicia pasouse o aviso aos Bombeiros de Ponteareas, á Garda Civil e tamén, por se fosen necesarios, aos Bombeiros de Vigo.
Máis tarde, o propio particular que informara do lume afirmou que o incendio puido ter a súa orixe na bufarda da vivenda, despois de que botasen un produto insecticida na cheminea para matar unhas abellas.
Tras quedar apagado o incendio, os membros dos Bombeiros de Ponteareas tamén confirmaron esta hipótese e aseguraron que, finalmente, o que ardera eran varios obxectos que había dentro da bufarda.
