O Consello da Garda Civil é o órgano do Instituto Armado que serve de enlace entre todos e cada un dos axentes que conforman a Benérita e o alto mando, desde a directora xeral ata o ministro do Interior. O lucense Marcelino García Bermúdez, actualmente destinado no destacamento de Tráfico de Verín, preséntase á reelección como vocal no citado organismo. García Bermúdez, que é o presidente da Unión de Gardas Civís, asociación profesional con gran representación a nivel estatal, estará mañá e o mércores en Pontevedra con motivo das votacións para a conformación dun novo Consello, no que espera manter o seu posto para defender os dereitos de todos os seus compañeiros.
Marcelino García Bermúdez quixo recordar que na provincia de Pontevedra existe unha importante carencia de persoal que é preciso cubrir. En concreto, destacou, "na provincia de Pontevedra agora mesmo hai 1.450 efectivos, polo que son necesarios preto de 150 para completar os persoais". O presidente da Unión de Gardas Civís explica que a súa función é a de servir "de ponte entre todos os nosos compañeiros e a Dirección Xeral, o Ministerio do Interior e o Ministerio de Defensa", á vez que recorda que nos últimos anos participou no medio centenar de reunións, manténdose moi activos a pesar da pandemia da covid-19.
García Bermúdez pide aos gardas civís o voto prometendo que desde o Consello seguirá loitando pola equiparación salarial, a conciliación familiar e laboral a través dunha mellora nas quendas de traballo, o dereito a sindicación no seo do Instituto Armado, a reestruturación do despregamento da Garda Civil, a readmisión de compañeiros "fundadores do asociacionismo expulsados do corpo nos 80 e os 90" e mellorar os medios que garantan a seguridade dos axentes en acto de servizo. Ademais, pedirá a concesión de medallas "de xeito xusto", así como a non aplicación do Código Penal Militar aos gardas civís, xunto á xa citada recuperación do persoal ata os niveis óptimos para ofrecer un bo servizo.
