Restaurantes e bares de novo en marcha, hoteis que xa empezan a recibir turistas, comercios coas rebaixas recentemente iniciadas... Son moitos os negocios que comezaron a ver a luz logo de meses de restricións durante os que a súa actividade se viu drasticamente limitada. E esta reactivación está a notarse xa cun aumento de contratacións para cubrir a tempada. Na provincia de Pontevedra prevese que se asinen un 20% máis de novos contratos que durante o verán de 2020. Así o estima a Confederación de Empresarios de Pontevedra (CEP), que engade que, se se teñen en conta tamén as saídas dos expedientes de regulación temporal de emprego que levarán a cabo moitas empresas coincidindo co período estival, crearanse un 45% máis de empregos que o verán pasado.
"Novas contratacións si, pero fundamentalmente as empresas están máis obrigadas a retirar aos traballadores dos ERTE. Esa é a prioridade, porque se trata de persoal xa cualificado e polo que se está pagando unha parte dos seus custos sociais. Aínda estamos a falar de 550.000 persoas", recordou o presidente da CEP, Jorge Cebreiros.
A relaxación das restricións anti-Covid, apoiada no índice de vacinación, activará especialmente o sector da hostalería e o turismo
Firmas de xestión de Recursos Humanos como Adecco coinciden en que durante os meses de xuño, xullo, agosto e setembro, na provincia producirase un incremento interanual na contratación do 20%.
De feito, esta entidade calcula que en Pontevedra se asinarán preto de 37.600 contatos, polo que este territorio liderará a campaña estival galega, seguido de A Coruña, para onde prevé máis de 19.800 contratacións. Segundo Adecco, Galicia será a sétima comunidade autónoma que máis emprego creará, "máis de 65.500 novos contratos, o que supón un incremento interanual do 19%, dos cales case 7.300 estarán vinculados á campaña de rebaixas", un 14,2% máis que o ano pasado.
"Vivimos un ano moi duro de face ao emprego, alcanzando taxas de paro nunca vistas, unha marca de persoas afectadas por Erte, incerteza", pero é o momento de reverter esta situación e empezar aos poucos a recuperar os niveis de emprego previos ao estalido desta crise. Sen dúbida, durante os próximos meses moitas das persoas que seguen acollidas a un Erte poderán reincorporarse ao mercado de traballo e, ademais, será o momento en que sectores máis castigados como a hostalería e o turismo poidan reactivarse a bo ritmo de facturación e contratación de persoal", afirmou Rubén Castro, director de Adecco Staffing.
Jorge Cebreiros, presidente da CEP: "As empresas afrontan moitas incertezas, serán prudentes"
Neste escenario, a actividade turística e a hostalería serán os sectores con maior reactivación, por iso prevese que entre os perfís máis demandados estean camareiros, cociñeiros, axudantes de cociña, camareiros de piso, monitores de tempo libre ou animadores e socorristas.
As rebaixas tamén provocarán un aumento da contratación de persoal para o comercio físico e online, non só de dependentes e reponedores, senón de profesionais da loxística.
José María Corujo, presidente de Aempe: "A actividade está a recuperarse e volvendo a certa normalidade"
Segundo Adecco, Pontevedra é a provincia galega que xerará máis oportunidades laborais vinculadas con este período de saldos, xa que estima a creación de case 4.000 postos de traballo, o que supón un incremento interanual do 14%.
"Como sucedeu o verán pasado, xorden novas profesións que se unen a estas contratacións estivais. Trátase de perfís que non existían antes da Covid-19, como desinfectadores de roupa e espazos ou rastreadores e auxiliares de praia", precisou a firma de xestión de RR HH.
