O PSOE provincial denunciou este mércores a "política propagandística" de Augas de Galicia con respecto á limpeza dos ríos e a "falta dunha planificación seria" para previr as inundacións nos tramos máis sensibles coa chegada das chuvias. O secretario xeral dos socialistas, David Regades, recalcou que "a política autonómica en materia de prevención de inundacións pódese resumir coa famosa frase de 'se chove que chova".
Tal e como indicou, segundo os datos publicados por Augas de Galicia, neste ano só se realizaron 20 actuacións de limpeza en 36 tramos interurbanos de ríos e regatos, a meirande parte en treitos moi pequenos. "Unha porcentaxe ridícula que non chega nin ao 0,1%", declarou Regades, quen engadiu que nin sequera se teñen priorizado os treitos declarados como Áreas con Risco Potencial Significativo de Inundación.
O socialista explicou que o único paso realmente significativo dado pola Xunta este ano foi "desfacerse" de 300 quilómetros de rede fluvial alegando que se trata de tramos urbanos, transferindo as competencias aos concellos e "sen dotalos dun só euro, a pesar de que hai moitos que carecen dos recursos necesarios".
Ante esta situación, o PSOE esixe que Augas de Galicia elabore e publique con antelación unha programación transparente coas actuacións de limpeza fluvial que se vaian acometer e que esa planificación inclúa un prazo de alegacións para os concellos e colectivos ambientalistas. Ademais, reclama que se redobren os esforzos preventivos nos leitos fluviais e que se estableza unha liña de axudas para os concellos.