A crise demográfica cargou Galicia de anos. O envellecemento que transformou a súa pirámide de poboación ata deformarla acúsase en cada actualización das cifras de poboación e convértea tamén na terceira comunidade autónoma máis entrada en anos. Esa é polo menos a súa posición no ranking autonómico da idade media, porque iniciou 2020 con 47,48 anos e só as veciñas Asturias e Castilla y León superan esa marca.
Eses case 47 anos e medio son cinco máis dos que tiña Galicia de media no inicio deste século, e ata quedan curtos para as provincias de Lugo e Ourense, porque a primeira roza os 50 e a segunda xa os supera. No extremo oposto está Pontevedra cos seus 45,88, atendendo ás cifras publicadas polo Instituto Galego de Estatística. As diferenzas dispáranse nos datos municipais.
A brecha entre concellos é tan grande que o que ten a media máis alta e o da menor están separados por máis de 20 anos. Son os que lle leva Lobeira —cos seus case 63— a Ames, con 40,6. ¿E en Pontevedra? ¿Onde están os extremos na provincia? En Forcarei, con algo máis de 57 anos, e Salceda de Caselas, con 41,37.
O mapa que acompaña a esta información permite consultar a idade media de cada municipio, ademais da súa poboación no último padrón publicado, o do inicio de 2020. Non parece casual que ningún dos concellos por enriba dos 60 anos alcance os 2.000 habitantes.
| Forcarei | 57,12 anos |
| Agolada | 57,02 anos |
| Crecente | 56,93 anos |
| Dozón | 56,84 anos |
| Covelo | 56,59 anos |
As cifras oficiais tamén constatan que, das sete principais cidades galegas, Pontevedra é a máis nova de todas con 44,38 anos. No ranking da provincia ocupa a novena posición.
| Salceda de Caselas | 41,37 anos |
| O Porriño | 42,38 anos |
| Ponteareas | 42,62 anos |
| Soutomaior | 43 anos |
| Gondomar | 43,49 anos |
