Un raio provocou un incendio no garaxe dunha vivenda na noite deste martes no lugar de Moreira, no termo municipal de Soutomaior, pero non houbo persoas feridas.
Segundo informou o 112 Galicia, o garaxe resultou "totalmente afectado" polo lume que provocou a caída dun raio. Pouco logo das 23.30 horas deste martes o servizo de urxencias recibiu a chamada dun particular que solicitaba axuda debido a que saía fume da instalación eléctrica da vivenda tras a caída dun raio no domicilio.
Nese mesmo momento, o Centro Integrado de Atención ás Emerxencias de Galicia informou aos Bombeiros do Morrazo, aos axentes da Garda Civil, aos Bombeiros de Pontevedra, aos membros de Protección Civil de Soutomaior e tamén á empresa subministradora da electricidade.
Logo de case cinco horas de traballo, os Bombeiros do Morrazo confirmaron ao 112 Galicia que o lume calcinou por completo o garaxe da vivenda, xunto cun vehículo, unha moto e varios aveños que se gardaban no interior.