A asociación Nofumadores.org iniciou unha recollida de firmas para instar á ministra para a Transición Ecolóxica e o Reto Demográfico, Teresa Ribeira Rodríguez, que declare todos os Parques Nacionais de España espazos sen fume de tabaco e sen cabichas. Unha medida que, de materializarse, afectaría en Galicia ás illas Cíes, Ons, Cortegada e Sálvora, que conforman o Parque Nacional das Illas Atlánticas. Ata o momento xa asinaron máis de 50.000 persoas.
"As cabichas de cigarros supoñen o 3,25% das causas dos incendios forestais, e xeraron a queima de máis de 40.000 hectáreas de bosques nos últimos 20 anos, é dicir unha superficie equivalente a 4 veces o tamaño da cidade de Barcelona. ¿Por que imos seguir permitindo que se queimen os nosos bosques cando se pode evitar?", expoñen os promotores da iniciativa a través da plataforma Change.org
Nesa liña, recordan que unha cabicha tarda ata 10 anos en degradarse, ademais de que contamina o chan con alcatrán, chumbo, mercurio, amoníaco e acetato de celulosa, "sustancias venenosas que quedan na auga e terra, envenenando así á nosa fauna, especialmente ás aves dos nosos bosques. Tamén chegan aos nosos ríos e arroios, matando aos nosos peixes, chegando logo á auga dos nosos encoros, que logo bebemos".
