O conselleiro de Sanidade, Jesús Vázquez Almuiña, destacou este martes que a ampliación do centro de saúde de Pazos de Borbén aumentará "nun 70%" a súa superficie útil.
Almuiña visitou este martes as obras de reforma e ampliación do centro de saúde nas que o Sergas vai investir 148.650 euros, informou a Consellería de Sanidade.
Os traballos, que comezaron este mes de febreiro, teñen un prazo estimado de tres meses e, concreta a Consellería de Sanidade, permitirán incrementar a superficie útil do centro nun 70%, pasando dos actuais 112 metros cadrados a preto de 190, unha vez terminadas as obras.
Esta actuación, incide Sanidade, "enmárcase dentro do plan de mellora das infraestruturas de Atención Primaria que leva a cabo o Goberno galego".
A reforma permitirá dotar ao centro, que atende a unha poboación de máis de 1.500 persoas, dunha consulta polivalente e unha de enfermería pediátrica, así como dunha sala de espera separada para pediatría.
Mentres duren as obras de reforma e ampliación, a atención sanitaria, explica Sanidade, prestarase no Punto de Atención Móbil —composto por dúas unidades— e "conformado como centro de saúde".