A presidenta da Deputación de Pontevedra, Carmela Silva, evitou pór unha data límite para a firma do pacto de goberno que están a negociar o PSOE e o BNG nesta institución e non descartou que os negociadores poidan chegar a un acordo despois do pleno de investidura, que terá lugar o vindeiro mércores 3 de xullo, aínda que subliñou que a ela lle gustaría que o pechasen "canto antes".
Carmela Silva recordou que ela non está na negociación do acordo, polo que se remitiu ás declaracións dos negociadores por ambos os partidos: o secretario xeral do PSdeG-PSOE na provincia, David Regades, e o actual vicepresidente da Deputación, o nacionalista César Mosquera, nas que aseguraban que o acordo está próximo a pecharse. "Seguramente terán razón", dixo.
"É imposible porlle data a cuestións de negociación", afirmou e agregou que "non é adecuado" porque "sempre hai cousas menores que acordar". "Pode ser esta fin de semana, o luns, o martes ou incluso o acordo podería chegar despois da toma de posesión", explicou.
A presidenta insistiu en que ela está "moi orgullosa" de estar á fronte nestes catro anos dun goberno bipartito co Bloque "e estaría moi honrada de volver facelo", declarou este xoves en rolda de prensa.
REPARTO DE COMPETENCIAS. Sobre as competencias que xestionará cada un, en resposta ás preguntas dos xornalistas, Carmela Silva admitiu que á vista do resultado electoral que propiciou que o PSOE incremente o seu número de deputados de 10 a 13, "a repartición terá que ser diferente".
En todo caso, a presidenta destacou que o acordo entre o PSOE e o BNG será "programático" e a distribución de áreas de xestión non é relevante posto que "haberá diálogo e acordos para tomar decisións en todo" e ademais "as áreas non son departamentos estancos", concluíu.
