A subdelegada do Goberno en Pontevedra, Maica Larriba, supervisou este venres o protocolo de actuación previsto para a apertura de novos pasos fronteirizos de tres localidades pontevedresas coas lusas que se atopan alén da raia. Será o luns día 15 cando se restablecerá a circulación, de luns a venres —entre as 8.00 e as 22.00 horas—, entre os municipios de Arbo e Melgaço, entre Salvaterra de Miño e Monçao e entre Tomiño e Vilanova da Cerveira, tras as reclamacións dos alcaldes de ambos os lados.
Con esa data sinalada no calendario, Larriba acudiu ao posto fronteirizo da Comisaría Xeral de Fronteiras e Estranxeiría en Salvaterra de Miño para manter unha reunión informativa sobre as medidas organizativas a poñer en marcha. Nese marco, interesouse polo protocolo en canto á circulación de traballadores co país luso. Xunto á subdelegada do Goberno estiveron a comisaria provincial da Policía Nacional, Estíbaliz Palma, e o comisario xefe de Galicia, José Balseiros.
"Esta nova medida de desescalada na circulación fronteiriza afecta exclusivamente á actividade laboral e comercial entre rexións, de acordo coas demandas realizadas polos alcaldes da zona, polo impacto económico que estaban a sufrir", sinalou a subdelegada do Goberno.
Os tres pasos que se reabren agora súmanse ao de Calvos de Randín
O delegado do Goberno en Galicia, Javier Losada, que avanzou a apertura este xoves, tamén recordou que esta medida responde ás diversas reunións coa Agrupación Europea de Cooperación Territorial do Río Miño Transfronteirizo, xunto á Cámara Municipal de Vilanova de Cerveira. Así, o Ministerio do Interior valorou a reapertura destes tres pasos, que se suman ao
Maica Larriba constatou que deste xeito "continúa o proceso de desescalada e o avance cara a unha nova normalidade, que permitirá recuperar os fluxos de tráfico e a convivencia entre os veciños dos municipios fronteirizos de Galicia e Portugal". "Pero, iso si, sempre dentro dos protocolos de seguridade e atendendo ás medidas adoptadas por cada país, xa que son a garantía para seguir tomando decisións sen riscos sanitarios", subliñou.
Tras varias semanas de protestas, os alcaldes da fronteira volveranse a concentrar este luns na ponte que une Arbo e Melgaço. Nesta ocasión será para celebrar a "vitoria e reapertura dos pasos fronteirizos, logo de todos os actos de protesta".
