O grupo Terras Gauda conseguiu minimizar ata un 20% o impacto ambiental no viñedo grazas a un software que analiza e interpreta en tempo real datos procedentes de sensores instalados nas vides, de satélites e do rexistro de actividades actuais e de anos previos. Esta ferramenta de viticultura de precisión enmárcase no proxecto europeo 'Foodie', no que Terras Gauda vén traballando xunto con diferentes socios durante os tres últimos anos.
As principais vantaxes do seu uso, informa a adega do Rosal nunha nota, son unha maior sustentabilidade ambiental pola optimización dos tratamentos e abonos; mellor rendemento das parcelas; inmediatez na toma de decisións sobre a intervención no viñedo e unha maior eficacia na xestión dos recursos. Ao dispor de recomendacións tan precisas, Terras Gauda diminuíu nun 20% o número de aplicacións fitosanitarias e un 15% o emprego de abono.
A estes logros hai que engadir un menor consumo de combustible da maquinaria necesaria para estas intervencións, co que se reduciron as emisións de CO2 á atmosfera e se obtivo, ademais, unha maior eficacia na xestión de recursos e custos de produción. Grazas aos datos achegados polos satélites, sensores e aos algoritmos de predición desenvolvidos por Seresco e a Misión Biolóxica-CSIC, Terras Gauda logrou mellorar o estado do viñedo en momentos clave como a floración, o callado do froito e a maduración.
Iso repercutiu de forma positiva na calidade, estado e produción da uva, posto que a plataforma achega recomendacións precisas e por parcelas para poder actuar segundo as necesidades de áreas de viñedo moi definidas. Proporciona alertas temperás de meteoroloxía, maduración, incidencias na vide; achega indicadores de vigor, humidade, choiva acumulada ao instante; realiza unha análise da evolución histórica tendo en conta todas as variables e establece o momento óptimo e a orde para vendimiar e incluso predicir a produción por parcelas.
