A desescalada non só se deixou notar nas terrazas. A apertura do peche perimetral púxose de manifesto este sábado na estrada PO-308 que une Pontevedra e Sanxenxo, que viu multiplicado o volume de tráfico durante todo o día en relación ás últimas semanas. Así, xa pola mañá o movemento cara ás praias foi constante. E a última hora da tarde formáronse longas colas de vehículos "que nalgúns momentos chegaban desde A Barca ata Sanxenxo", sinalaron fontes da Policía Local de Poio. "Parecía 15 de agosto", engadiron. Foron moitos os pontevedreses que escolleron gozar dun día primaveral a beiras do mar. Así, as praias de Poio, Marín e Sanxenxo foron o principais destinos escollidos por centenares de persoas. Durante todo o día levaron a cabo controles tanto na estrada como a nivel de praia ou nas terrazas. En Marín, a Policía Local non rexistrou incidencias e destacou o "excelente" comportamento en xeral da cidadanía á hora de respectar as medidas de seguridade.
En Poio, polo menos catro establecementos hostaleiros foron advertidos pola Policía Local por incumprir a hora de peche. O incesante goteo de clientes fixo que a escasos minutos das seis da tarde, hora decretada para pechar, seguisen servindo consumicións. Os controis incrementaranse de novo e a Policía xa avisou de que empezarán a denunciar a todos aqueles que incumpran a normativa. "Todos teñen que cumprir o horario a machada e teñen que pechar ás seis en punto", sinalaron fontes policiais.
Os paseos ao sol, os pr
imeros baños na praia e xogos na area deixaron unha imaxe tipicamente estival nas Rías Baixas.
MÁS SOL. Todo apunta a que de novo, será un día para gozar ao aire libre. E é que este domingo Galicia continuará baixo a influencia das altas presións, polo que non se esperan cambios significativos no tempo. Os ceos estarán despexados en xeral, con algún intervalo de nubes baixas no extremo norte e néboas matinais en puntos do interior.
Así mesmo, segundo a información de Meteogalicia, as temperaturas sufrirán un lixeiro descenso aínda que de novo se espera que Pontevedra e os municipios da contorna se aproximen aos vinte graos.
