O Consello da Xunta aprobou este xoves o primeiro plan reitor de usos e xestión do Parque Nacional das Illas
Na comparecencia de prensa posterior, Núñez Feijóo destacou a importancia "fundamental" deste plan para regular o "único Parque Nacional que existe en Galicia" e para apontoar a súa candidatura á declaración como Patrimonio da Humanidade por parte da Unesco, que dá "dous pasos adiante" con esta medida.
O obxectivo deste documento é "garantir a conservación para a próxima década" destes espazos, dos que na mañá deste xoves o presidente galego destacou o seu valor ambiental e paisaxístico, así como a súa biodiversidade.
Con este motivo implantaranse cotas máximas de aforamento en tempada baixa e en tempada alta, comprendida entre maio e setembro xunto cos festivos de Semana Santa, nas illas de Ons: as únicas do Parque Nacional que non contaban con esta medida xa implantada en Cíes, Cortegada e Sálvora.
Deste xeito, establecerase para Ons un máximo de visitas de 1.300 persoas diarias a título individual e de 200 en visitas grupales, xunto cun límite de 300 usuarios do cámping existente.
Pola súa banda, nas Illas Cíes poderá haber un máximo de 1.800 visitantes diarios individuais, así como 200 adicionais en grupos organizados e ata 600 campistas.
En tempada baixa, os límites fixados serán de 450 persoas en visitas organizadas para cada arquipélago, mentres que Cortegada e Sálvora manterán a mesma cota de 250 persoas como máximo durante todo o ano
Así mesmo, o plan tamén dispón de normativa nos ámbitos de urxencia e autoprotección, ademais de zonificar o parque para unha correcta repartición dos usos en función da superficie existente ou a profundidade da auga que o rodea.
Deste xeito, inclúense medidas para erradicar especies invasoras desta área e regúlase o aproveitamento pesqueiro que se pode facer da mesma, xa que se permitirá o mantemento de actividades tradicionais mediante cotas previamente asignadas e, paralelamente, impulsarase unha marca de calidade para distinguir e regular os produtos que teñan orixe neste parque.
"Sen este plan de usos, de protección e de xestión responsable probablemente as posibilidades de conseguir as declaracións de Patrimonio da Humanidade serían moi limitadas", advertiu Núñez Feijóo, que subliñou que o documento é o resultado dun traballo de ano e medio por parte da consellería e foi acordado con diferentes axentes.
