Na Barcelona de 1960, unha prostituta (Adriana Ugarte) acaba no epicentro do tráfico de heroína, que lidera na capital condal o xefe mafioso Malpica (Javier Rey). Ese é o punto de partida de Hache, a última produción española de Netflix, que se estreará na plataforma o 1 de novembro.
A compañía deu a coñecer este mércores a data da estrea da serie, composta por oito capítulos dunha hora que se difundirán simultaneamente en máis de 190 países, e o seu primeiro trailer, no que se intúen os problemas e o asedio policial ao que será sometida Helena, o personaxe de Ugarte, como vínculo coa mafia que lidera Rey.
Esta produción de Weekend Studio, que está baseada en feitos reais, é unha creación de Verónica Fernández (Cuéntame, Velvet Collection) dirixida por Jorge Torregrossa (Fariña), que tamén conta coas interpretacións de Eduardo Noriega (Los miércoles no existen), Marc Martínez e Ingrid Rubio, entre outros.
Noriega interpretará ao inspector que lidera a brigada de narcóticos de Barcelona, sempre tras a pista do mafioso ao que dá vida Rey. O núcleo da banda estará no Club Albatros, un local nocturno no que coinciden todos os veciños e turistas de Barcelona, con distintos contextos socioeconómicos e persoais.
Hache converterase na quinta produción de Netflix integramente española que estrea a plataforma de pago este ano, logo de Élite, Alta Mar, La casa de papel e Paquita Salas.