Un neno desexa con todas as súas forzas ter un irmán. Por iso se encapricha dun boneco co que comparte todo o seu tempo, ata que este se estraga deixando ao protagonista da historia moi triste. Romper cos estereotipos sexistas que predominan tamén nos xoguetes é unha das finalidades da curta de stop motion 'O boneco', que dirixe Daniel Lizarronne e que estes días busca na plataforma Verkami financiamento para poder ser unha realidade.
"Esta sería só a primeira curtametraxe dun proxecto de curtas autoconclusivas, historias independentes que pretenden revisar contos infantís para xerar unha pequena serie de animación na que se lle dea a volta a prexuízos, estereotipos e roles que se nos asignan xa dende pequenos", explica Lizarronne.
Deste xeito, a primeira historia da serie xa ten feito o storyboard e os traballos de preprodución. "Agora traballamos no deseño dos personaxes, para iso precisamos estruturas, que van por dentro dos bonecos e teñen un custo de preto de 3.000 euros só para catro personaxes", explica Lizarronne. É por iso que "O boneco" está á procura de mecenas na plataforma Verkami.
MORALEXA. Segundo explica o propio Lizarronne, a primeira curtametraxe do proxecto trata de explicar o valor de compartir tempo cos avós e ten como moralexa a idea de que "as cousas son efémeras e hai que sentirse agradecido por poder ter vivido certas experiencias cando esas persoas xa non están", conta o director. Do mesmo xeito, incluír a figura da avoa é un xeito de facer fincapé na relación cos avós. Esta non é só unha historia destinada a público infantil, senón que tamén está pensada para os adultos. "É unha curta sobre a empatía, sobre como superar a tristura dunha perda", indica.
A curta conta con guión da mestra de Educación Primaria e especialista en roles e estereotipos de xénero Sara Rodríguez. Os encargados do son son Irie Works e Anahí Sotelo encárgase da creación dos escenarios do filme. "Queremos ter un acabado máis técnico para poder buscar algún medio de distribución, como por exemplo Movistar, para poder amosar a nosa película", contan.
O director do filme espera poder ter rematada a primeira produción en setembro deste ano. "Se optas ás axudas da Xunta tes que adiantar os investimentos para poder ter o proxecto listo en setembro, antes de recibir a subvención, por iso se fai un pouco complicado poder acadar este tipo de financiamento", conta o cineasta, licenciado en Belas Artes que prepara a súa tese de doutoramento sobre psicoloxía da ilustración, centrándose nos estereotipos que se reproducen por este medio. Se non é posible acadar todos os cartos precisos para levar a cabo a curtametraxe nos próximos meses, Lizarrone ten previsto rodala igualmente, aínda que o proceso se dilate algo máis no tempo.
"Mentres estudaba decateime, por exemplo, de que existen moi poucas mulleres heroínas nas historias", explica o director, que recoñece que lle está a custar atopar contos tradicionais para poder adaptalos e facer curtas libres de estereotipos. "Queremos revisar as historias e actualizalas", explica e sinala que se centrará en lendas e contos tradicionais galegos para seguir adiante cos seguintes episodios do proxecto.