Hipnosis é o título da exposición que o artista búlgaro Ivo Sirakov inaugura mañá (20.00 horas, entrada libre) no Liceo Casino da Pontevedra A mostra, organizada polo Ateneo, poderase visitar durante todo o mes de marzo (de luns a sábados, de 10.00 a 22.00 horas).
Deseñador gráfico, ilustrador e pintor, o creador, orixinario de Bulgaria, pero fincado en Altea (Alacante), defínese como "artista onírico" e centra o seu interese fundamentalmente no retrato da figura feminina e da natureza, na maior parte dos casos nun contexto de fantasía.
Nacido en 1975, a súa primeira exposición individual tivo lugar no ano 1992 en Asenovgrad, unha cidade do sur de Bulgaria. No seu país seguiu protagonizando mostras ata o ano 2001.
España
No ano 2005 expón por primeira vez o seu traballo en España. Desde entón fíxoo tanto na Comunidade Valenciana como en Madrid, Andalucía ou Aragón. Tamén viaxou coa súa obra a Estados Unidos (Los Ángeles e Nova York) e Italia (Florencia).
A de Pontevedra será a súa primeira exposición en Galicia. "O ser humano é fascinante desde un punto de vista artístico. Desde o punto de vista evolutivo non tanto (...) Gloria e valor non teñen o mesmo valor que unha vitoria sobre a debilidade da razón", di o artista sobre a serie Hipnosis, que trae ao Liceo Casino. "Quen sempre souberon velo foron as mulleres, as únicas capaces de hipnotizar, encantar e revolucionar a mente. Chamanas, bruxas, profetas, sibilas, sacerdotisas e matronas, as nais da humanidade, sempre recibiron un enorme respecto e tiveron unha gran importancia para todas as civilizacións antigas".
