Comeza a rodaxe de '3Camiños', a primeira serie internacional sobre a Ruta Xacobea

Román Rodríguez presentou en Madrid esta produción, vinculada ao Xacobeo 21 e que prevé estrearse a finais deste ano 
Presentación de '3Camiños'. XUNTA
photo_camera Presentación de '3Camiños'. XUNTA

Os actores Álex González, Verónica Echegui, Anna Schimrigk e Alberto Jo Le, entre outros, inician estes días a rodaxe de 3Camiños, a primeira serie de televisión internacional e transmedia sobre o Camiño de Santiago, apoiada pola Xunta de Galicia como a gran produción audiovisual do Xacobeo 21 e que prevé estrearse a finais deste ano. 

O conselleiro de Cultura, Román Rodríguez, participou este martes en Madrid na presentación desta serie, que encabeza a empresa compostelá Ficción Producións e que conta co apoio internacional de Amazon Prime Vídeo e do grupo alemán Beta Films, así como coproductores de Italia, Corea do Sur, México e Portugal, a Radio Televisión Portuguesa e a produtora Cinemate. 

Durante a presentación ante 50 medios nacionais e internacionais acreditados, o responsable de Cultura destacou a capacidade desta serie para desenvolver a industria audiovisual, así como para impulsar a internacionalización do Camiño de Santiago, especialmente ante o novo ciclo Xacobeo 2021-2032. 

Así, Román Rodríguez destacou o bo momento do audiovisual galego e puxo en valor a capacidade do sector para difundir os valores da Ruta Xacobea en novos mercados, así como para atraer públicos diversos.

A FINAIS DE ANO. A produción, que se estreará a finais de 2020 e relata as vivencias compartidas ao longo do tempo por cinco mozos peregrinos de diferentes países, recibiu unha achega de 1,5 millóns por parte da Xunta. 

Na serie, o espectador asistirá á transformación e ao crecemento persoal de cada un dos protagonistas e das súas relacións, en tres momentos concretos --2000, 2006 e 2021-- nos que comparten peregrinación. 

A través dos seus personaxes, a serie trata de reflectir as miles de vivencias que suceden cada ano no Camiño de Santiago a todos os peregrinos que o realizan. 

Ademais da propia serie, 3Camiños contará cunha gran campaña transmedia, elaborada por Fluor Lifestyle, para difundir a imaxe de Galicia, o Camiño de Santiago e o Xacobeo 21. 

Comentarios