Tras verse obrigados a aprazar o inicio da rodaxe en Pontevedra a semana pasada debido ao mal tempo, o equipo da serie Un asunto privado empezou este luns a traballar en Michelena, onde, entre outras cousas, se instalou un guindastre para iluminar desde o exterior unha secuencia rodada no interior dun dos edificios desa rúa do centro da cidade.
A gravación da serie, a primeira de Bambú Producións para Amazon Prime Vídeo, continuará durante os próximos días na capital da provincia. Coa pontevedresa Teresa Fernández-Valdés como produtora executiva, Un asunto privado conta entre os seus protagonistas co actor francés, de pais españois, Jean Reno (Léon, o profesional) e a actriz Aura Garrido (O Ministerio do Tempo). Ademais de en Pontevedra, a serie tamén inclúe localizacións en Vigo.
