martes. 24.11.2020 |
El tiempo
martes. 24.11.2020
El tiempo

"A cultura si é segura; non houbo contagios en eventos celebrados en Galicia"

Jordi Lauren foi o elixido polo xurado dos Iberian Festival Awards para o premio á Excelencia. DP
Jordi Lauren foi o elixido polo xurado dos Iberian Festival Awards para o premio á Excelencia. DP
O bueunense acaba de recibir o premio á Excelencia que conceden os Iberian Festival Awards e nos que o evento de música de Bueu logrou ser finalista en dúas categorías, mellor festival de mediano formato e mellor comunicación e estratexia de mercadotecnia â?? A organización xa traballa no Sorrías Baixas do ano 2021

Bueu converteuse nun dos puntos de referencia dos festivais musicais que se realizan na península. O Sorrías Baixas gañouse con suor a admiración do sector e proba diso é o recoñecemento que acaban de facerlle ao evento por medio do seu codirector, Jordi Lauren. Trátase do premio á Excelencia que se concede nos Iberian Festival Awards e no que consideran ao bueuense como o personaxe máis relevante da industria dos festivais en España e Portugal, polo seu papel, visión e enerxía como impulsor da música en directo dun xeito dinámico, creativa e positiva.

Recibiu un premio deses que recoñecen o duro esforzo que supón sacar adiante un festival musical e ademais facelo cun resultado de alta calidade.

Estamos atafegados porque é a nivel internacional. E ademais non está vinculado a algo concreto do festival, senón á constancia e o bo facer. A diferenza dos outros apartados nos que estabamos entre os finalistas, este premio sorprendeunos porque non o soubemos ata o último día, pois o outorga un xurado.

¿O galardón é unha inxección de ánimo agora que atravesamos momentos tan complicados?

Todo axuda. Vivimos o día a día como toda a sociedade, pero traballamos a lume de biqueira para poder volver gozar e socializar no 2021. Hai que seguir adiante.

Estaban nomeados a outros dous premios: Mellor festival de mediano formato e mellor comunicación e estratexia de mercadotecnia. ¿Que ten que dicir do equipo do festival e da produtora Play Plan?

Nos últimos anos estivemos nomeados a varios premios. Son cinco finalistas por cada país, o que significa estar entre os cinco mellores de España. Respecto de Play Plan, énchenos de orgullo que unha empresa de Bueu sexa capaz de chamar a atención da industria peninsular. Non fai falta ser enorme, o importante é contar cun gran equipo humano.

Fai falta unha mesa de profesionais que traballen para volver á normalidade prepandemia canto antes

Toda a sociedade está a padecer esta crise sanitaria e económica. A cultura e a música, especialmente, son dos sectores máis afectados. ¿Como influíu nos festivais musicais?

A pandemia deunos na liña de flotación. Organizar isto é moi difícil. Trabállase 12 meses para recoller os froitos en dous ou tres días. Pasamos momentos complicados porque afecta a moitos postos de traballo e non sabemos cando poderemos volver traballar con normalidade. Incluso pola propia saúde mental da sociedade. Quero destacar o labor das asociacións galegas e portuguesas ás que pertencemos e pedir que se lles escoite para reconstruír todo. Que poidan traballar de xeito conxunto coas administracións.

¿Foi un acerto levar a cabo o festival, aínda que fóra en formato máis reducido?

En realidade o festival suspendeuse. Fixemos un micro con dous concertos para 800 persoas cada un. Mesturamos a música co sendeirismo e a gastronomía. Foi un xeito de intentar manter a promoción do territorio. Estes festivais son dinamizadores do turismo.

Pasaron de 8.000 espectadores a 800, pero aínda así son cifras que poden asustar na actual situación. ¿Facer cultura é seguro?

Na cultura non houbo ningún contaxio en toda Galicia. Demostrouse a profesionalidade dos promotores culturais. Todo está moi estudado e os protocolos son incluso máis esixentes do que marca a lei. Rexémonos polas normas que indican as autoridades e logo os técnicos desenvolven as medidas pertinentes para cada situación e evento. Hai unha gran protección e ata nas salas parece improbable que se produzan contagios. Ata agora está a ser impecable a seguridade.

Desde todos os sectores está a pedirse o apoio das administracións para tratar, polo menos, de sobrevivir mentres dure esta situación. ¿Cales son as demandas da industria musical fóra dos aspectos económicos?

Que nos sentemos a traballar para volver á normalidade prepandemia canto antes. Unha mesa de profesionais de todas as ramas, nas que participe sanidade, seguridade pública, seguridade do traballador...

Segundo un estudo, o impacto que produce o festival no territorio é de máis dun millón de euros de retorno

O festival contan coa axuda do Concello de Bueu e de organismos dependentes da Deputación de Pontevedra e a Xunta de Galicia. ¿Satisfeitos?

Axúdanos a que sexa mellor, pero non dependemos absolutamente deles. Entenden que temos un impacto social e económico potente. Con cada euro que nos dan producimos un efecto multiplicador. Segundo un estudo da Universidade de Santiago o impacto no territorio é de máis dun millón de euros de retorno

¿Están xa ás voltas coa edición de 2021?

Pola nosa forma de traballar necesitamos facelo con tempo. Logo veremos se se pode facer con normalidade ou teremos que irnos adaptando ás circunstancias do momento. Hai que adiantarse ao futuro.

"A cultura si é segura; non houbo contagios en eventos celebrados...
comentarios