Está en Simes (Meaño), na súa casa, pero Eloy Domínguez Serén (1985) pasea a diario a ollada polo Ártico. Porque o cineasta, que acaba de estrear a súa película Hamada nas plataformas Filmin e Márgenes, aproveita a corentena para traballar en novos proxectos. Un deles é unha longametraxe de ficción, The Darker It Gets, produción sueca (Momento Film) que se rodará na rexión ártica.
"O estado de alerta pilloume traballando aquí, en Galicia", explica o realizador. "Estamos preparando a rodaxe dunha curta de ficción que transcorre na Costa da Morte". En concreto, o equipo estaba localizando: buscando os escenarios nos que a curtametraxe se ía rodar esta primavera. "Agora quedou aprazada", explica sobre Rompente, que é como se titulará esta produción de Zeitun Films. "Afortunadamente o confinamento pilloume con moito traballo, con moito material acumulado. E a el me estou adicando".
"Afortunadamente o confinamento pilloume con moito material acumulado", di o director. "A el me estou adicando"
Por un lado, está a preprodución de Rompente e por outro a preparación da longa de ficción que rodará no Ártico, un espazo no que xa estivo filmando. "Por último estou a traballar nun proxecto de correspondencia filmada co cineasta colombiano Samuel Moreno, un proceso de intercambio que está resultando moi bonito", indica o director. "Ásí que ando ben entretido estes días".
Domínguez Serén conta tamén que está a gozar especialmente de que a súa película máis importante ata o momento chegase á rede. "Está sendo unha experiencia moi fermosa porque estou recibindo moitas mensaxes de agarimo. Estou feliz de saber que, dalgunha maneira, a película está contribuíndo a axudarlle a levar mellor este momento a moita xente".
ONLINE. Segundo conta o cineasta, a plataforma de cine online Filmin levaba tempo interesada en incluír Hamada no seu catálogo. "Pero estas cousas teñen os seus tempos. A película tiña que pechar primeiro a súa distribución nos festivais e despois chegar ás salas. No medio de todo isto chegou o confinamento e foi así como rematou directamente nas plataformas Filmin e Márgenes". A primeira delas, para celebrar a estrea, convidou ao realizador de Meaño a escoller as que son as películas favoritas do seu catálogo. Elixíu cinco: Canciones del segundo piso, de Roy Andersson; Morir en Madrid, de Frédéric Rossif; La patrulla de la muerte, de Andrzej Wajda; Carretera asfaltada en dos direcciones, de Monte Hellman, e Pasión, de Ingmar Bergman.
Entre as explicacións que achega Domínguez Serén sobre a súa selección hai eloxios aos directores ("Creo que Roy Andersson es el cineasta que más me ha emocionado a lo largo de los últimos años, desde la carcajada más desenfrenada hasta el afecto más desgarrador"), referencias persoais básicas ("Morir en Madrid es una película colosal y demoledora, a la que regreso cada cierto tiempo, y que siempre me produce dolor, aflicción, fascinación y admiración") e o seu amor por Suecia, case un país de adopción para o realizador ("Pasión es una de las películas más bellas y dolorosas que he visto nunca. El idioma sueco emocionándome profundamente, una vez más").
Eloy Domínguez Serén traballou en distintos medios de comunicación, como Diario de Pontevedra, antes de iniciar a súa carreira como cineasta. Entre outras cousas foi tamén cofundador e codirector da revista A Cuarta Parede. No ano 2012 trasladouse a Suecia, onde realizou a súa primeira curta, Pettring. A súa película No Cow on the Ice, de 2015, conseguíu posicionar o seu cine a nivel internacional ao facerse con galardóns en distintos festivais. O seu talento confirmouse con Hamada, un filme multipremiado co que conquistou á crítica.
AS ESCOLLIDAS EN FILMIN
Canciones del segundo piso
Morir en Madrid
La patrulla de la muerte
Carretera asfaltada en dos direcciones
Pasión
