Redondela primeiro (venres 19 de xuño) e Cangas despois (sábado 20) acollerán esta semana a estrea da última película de Ignacio Vilar, María Solinha, un filme que se rodou maioritariamente nestas dúas localidades da provincia de Pontevedra. Apoiada pola Xunta de Galicia, a través da Axencia Galega das Industrias Culturais (Agadic) e pola Deputación Provincial, María Solinha volve sobre a figura da muller de Cangas do século XVII acusada de bruxería e posteriormente convertida nun símbolo. Grial Montes e Laura Míguez son as figuras centrais dun reparto do que tamén forman parte Santi Prego, Antonio Durán Morris e Mabel Rivera.
►Toda a información sobre a película pódese seguir nas súas redes sociais e na páxina web www.vialacteafilmes.gal
O director do título, Ignacio Vilar ( Vilamor, A esmorga), ofrece cinco razóns para non deixar pasar a oportunidade de achegarse ao seu traballo, que se exhibirá ao longo do verán en distintos espazos de Galicia (auditorios ao aire libre, cines de rúa, autocines, etc.) e posteriormente en salas.
1. "Hai que ver María Solinha porque é unha crónica imparable da enerxía feminina deste mundo, fronte a tantos dragóns ou cocos malos -de Redondela ou de onde sexa- que saen das covas, unha e outra vez, para devorar a carne viva do mundo".
2. "Porque trata da continuidade histórica dos espazos e os xeitos de vida ao longo do tempo. Os personaxes do XVII deambulan polo Cangas contemporáneo, creando un dispositivo narrativo que mestura realidade, ficción e documental, reconstrución e recreación nun xogo de espellos enfrontados que por veces non somos quen de diferenciar con claridade".
3. "Pola tension que crea a película nunha sucesión de planos que non contan, só evocan para que os ollos que reciben reconstrúan os fíos que van asomando. Porque somos nós, as espectadoras, quen debemos darlle a forma definitiva ao filme. Libre. Como a vida das mulleres".
4. "Porque o plano secuencia continuado na película produce un efecto hipnótico. A pantalla convertese na conciencia do espectador que deambula como un espírito entre as personaxes. Estamos nunha distopía na que se reúnen o contemporáneo e o século XVII para mesturar realidade e ficción, teatro e documento nunha constructo sólida e sorprendente".
5. "Porque a película de María Solinha deixa nos miolos unha pregunta incómoda: tres séculos despois fican as mulleres a salvo de todo tipo de Inquisición? Faino a través dun compromiso claro co feminismo e a memoria contado de xeito orixinal e innovador que non deixa indiferente e que converte María Solinha nunha cita ineludíbel neste verán do 2020".
🧙♀️🎦 @mariasolinha, a nova película de @IgnacioVilar1, estréase este venres dun xeito moi especial. E se queres saber máis sobre o filme, escoita ao seu director hoxe en #ARevista, premendo neste enlace #CinemaGalego 👉 https://t.co/nSEvpcW7NR pic.twitter.com/gncXHq2MUb
— TVG (@TVGalicia) June 15, 2020
Verín
O domingo 21 de xuño terá lugar a seguinte proxección programada polos responsables de María Solinha. Será en Verín (Ourense), ás 22.00 horas, co formato autocine (no parking central da vila). Esta é precisamente unha das particularidades da distribución do filme, que anunciou a súa exhibición en máis de 100 localidades galegas ao longo do verán (ao aire libre ou en autocines). As entradas para o pase de Verín están á venda en ataquilla.com (8 euros).
Pontevedra
Á espera que se coñeza o calendario definitivo de proxeccións do filme, en Vía Láctea tamén avanzan que fóra desas exhibicións especiais quedan, en principio, as grandes cidades galegas e vilas que contan con salas de cine comercial. "Porque a nosa intención é poder chegar a estrear nos cines cando estean instalados nesta nova normalidade". Sería o caso, por exemplo, de Pontevedra, que terá que agardar polo momento para ver o título de Vilar.
Toda a información sobre a película pódese seguir nas súas redes sociais e na páxina web www.vialacteafilmes.gal.
