Luis Tosar rodará 'La sombra de la ley', un filme de gángsters nos anos 20

O actor galego Luis Tosar porase de novo ás ordes do director Dani de la Torre (El desconocido) en La sombra de la ley, unha película de gángsters ambientada na España dos anos 20 que se rodará entre Barcelona e Galicia a partir do próximo 12 de xullo. Michelle Jenner, Vicente Romero, Ernesto Alterio, Paco Tous e Manolo Solo completan a repartición desta produción de Vaca Films e Atresmedia Cine que será distribuída tanto en España (Hispano Foxfilm) como fóra (Films Distribution), segundo informaron este mércores as produtoras nun comunicado.

Inspirada en feitos históricos, a película quere "ser un reflexo da sociedade española de principios do século XX". A trama, escrita por Patxi Amezcua (Atrapa la bandera, Séptimo), xira ao redor de Aníbal Uriarte, un policía enviado a Barcelona para colaborar na detención dos ladróns dun tren militar. Corre o ano 1921 e España vive un momento axitado e caótico: son os anos do chumbo, froito dos violentos enfrontamentos rueiros entre matóns e anarquistas, e os negocios ilegais están instalados na sociedade.

Segundo Dani de la Torre, La sombra de la ley é "un thriller cheo de tensión e constantes xiros na trama, con gran peso de temas como a honra, a supervivencia e a loita por atopar o camiño para lograr unha sociedade máis xusta".

O director galego, nomeado ao Goya o ano pasado coa súa ópera prima, El desconocido, confésase un apaixonado das películas de gángsters. "O arranque do século XX foi unha época convulsa, chea de loitas sociais, sindicais e territoriais. De fondo, o jazz invadía os clubs da cidade e as saias recortábanse por encima do nocello: a discreción e o recato empezaban a pasar á historia", explicou.

Neste contexto, o protagonista, Aníbal, terá unha difícil misión que o levará a convivir con empresarios sen escrúpulos, pistoleiros a soldo, perigosos anarquistas e policía corrupta, nunha viaxe onde "loitará por sobrevivir, volverá descubrir o amor e onde a única lei que impera é a das armas". A rodaxe desenvolverase durante oito semanas. Comezará o 12 de xullo en Barcelona e a partir do día 23 o equipo trasladarase a Galicia para rodar en localizacións de Pontevedra, Lugo, Monforte de Lemos, A Coruña e Santiago de Compostela, escenarios onde transcorrerá gran parte da acción.

Con Juan Pedro Gaspar no deseño de produción, Josu Inchaústegui como director de fotografía e Clara Bilbao no deseño de vestiario, a filmación levarase a cabo en máis de 80 decorados naturais exteriores e interiores.