O escritor Domingo Villar, que desde a madrugada do luns permanecía ingresado na Uci do Hospital Álvaro Cunqueiro tras sufrir unha hemorraxia cerebral, faleceu en Vigo aos 51 anos. Aínda que residía en Madrid, acudira á súa cidade natal a coidar á súa nai, Rita, afectada de problemas de saúde.
"Este home foi capaz, a través da súa narrativa, a súa forma de escribir, de trazar parcelas tan importantes na literatura nas que o nome de Vigo aparece", dicía del este luns o alcalde da cidade olívica, Abel Caballero, desexando unha pronta recuperación ao literato que, lamentablemente, non se produciu.
E é que falar de Domingo Villar é falar de Vigo e de novela negra, por nacemento e por elección. Nacido na cidade olívica en 1971, a súa vinculación coa urbe non foi só por nacemento e por familia, o era tamén por elección, como escenario de novelas e intrigas.
En 2006 publicou o seu primeiro traballo Ollos de auga, e co segundo, A praia dos afogados, consagrouse no panorama nacional e internacional da novela negra, con gran éxito en vendas e crítica. Foi, de feito, un dos nomes máis importantes do país neste xénero e un auténtico superventas da man da súa inspector estrela Leo Caldas.
Pero non só dentro do territorio nacional, tanto Ollos de auga como A praia dos afogados foron traducidas a máis de 15 idiomas, levando as rúas da súa Vigo natal máis aló das fronteiras españolas.
Tras un parón, O último barco foi o título da súa última novela publicada, que data do ano 2019, e na que retoma de novo ao inspector Leo Caldas. Entre medias, en 2014, levou a cabo a adaptación ao cine de A praia dos afogados, dirixida por Gerardo Herrero, que contou con localizacións de Vigo, Nigrán e A Guarda, así como cun elenco no que estaban Carlos Branco, Tamar Novas ou Marta Larralde.
Grazas ás súas obras, o autor cultivou un gran número de premios, como o Novelpol en dúas ocasións, o Antón Losada Diéguez, o Premio Sintagma, o Premio Brigada 21, o Frei Martín Sarmiento ou o Libro do Ano da Federación de Libreiros de Galicia.
Tamén foi finalista doutros importantes galardóns como os Crime Thriller Awards e Dagger International no Reino Unido, do premio Lle Point du Polar Européen en Francia e do premio Martin Beck da Academia Sueca de Novela Negra.
Ademais, este mesmo ano, no mes de marzo, Domingo Villar foi recoñecido na súa cidade natal co título de Vigués Distinguido, por toda a súa traxectoria literaria na que Vigo sempre tivo un lugar protagonista. O seu maior recoñecemento, no entanto, foi a súa lexión de lectores e o gran éxito que as súas obras cultivaron entre o público.
"Un home bo, agarimoso, atento"
"A Editorial Galaxia está consternada, rota de dor, diante deste feito inxusto e terrible. A morte sempre é dura de aceptar, pero cando falamos dalguén tan novo, tan cheo de vida e alegría como foi Domingo VIllar, daquela vólvese algo inaturable. Dende a Editorial Galaxia sumámonos á dor da súa familia, de Bea e dos seus tres fillos, así como dos milleiros de lectoras e lectores que Domingo Villar tiña espallados por todo o mundo. Na nosa lembranza queda para sempre o recordo eterno dun home bo, agarimoso, atento, sempre fiel a esta editorial e a quen queriamos coma un irmán. Descansa en paz, Domingo querido. Non imos esquecerte nunca", difundiu a Editorial Galaxia tras coñecerse a noticia da morte do autor.
