O debutante Dani de la Torre "xa non pode pedir máis" a 'El desconocido'

O realizador galego Dani de la Torre, un debutante que logrou con El desconocido oito nomeamentos para os Premios Goya 2016, comentou que xa "non lle pode pedir máis", a esta película, a sexta máis taquilleira do ano, e que se alegra especialmente do nomeamento ao mellor guion.

"A verdade é que me fan moita ilusión todos os nomeamentos, pero a que máis, o guión de Alberto Marini, porque nos atacaron moito, e el pasouno mal; era un thriller de acción, unha película arriscada para España, ese era o seu compoñente de risco, e cargouno Alberto", sinalou.

Contou que este luns pola mañá seguiu traballando na televisión galega, onde acude todos os días, e non quixo ouvir en directo as lecturas porque "xa estaba bastante nervioso", pero lle foron chegando whatsapps e "foi imposible evitalo", sorrí.

"É precioso todo o que está a pasar coa película, non só por ser a sexta máis taquilleira, e as cousas que nos din polas redes sociais; os premios -engade- son moi bonitos, ponnos no escaparate e dannos forza, pero os directores contamos historias para o público".

"Para min -resumiu-, o mellor é que a xente vaia ao cine e esta película compensounos por todas partes".

Xa está o monfortino preparando outro thriller de acción, de novo con Vaca Films e Atresmedia, esta vez de época, co mesmo equipo de El desconocido.

Salvo Techo y comida, que non chegou a Santiago de Compostela onde vive o director e "apenas se estrea ese tipo de película", De la Torre viu todas as películas dos seus competidores como mellor director novel, aínda que está convencido de que non é unha cuestión de competencia: "O bonito é estar aí, este ano foron 65 películas; isto temos que tomalo como unha festa e un premio".

Dese modo, agregou, "o noso premio é facer a película; alégrome moito por Leticia (Dolera) sobre todo, pero é encantador que haxa moitos xéneros, e xente diferente, esa variedade é moi importante".