O Simposio María Vitoria Moreno, posto en marcha pola Real Academia Galega (RAG) coa colaboración da Consellería de Cultura, pechou este mércores os actos postos en marcha ao redor da autora á que se lle dedicaron as Letras Galegas de 2018.
O evento, que se celebrou durante as tardes do 27 e 28 de novembro na sede da RAG, foi clausurado este mércores polo secretario xeral de Política Lingística, Valentín García, e o presidente da Academia, Víctor Freixanes.
Este simposio, organizado polas académicas Fina Casalderrey e Marilar Aleixandre, reuniu tanto a especialistas na obra da escritora como persoas que a coñeceron persoalmente e achegaron o seu perfil máis humano.