"Queremos que este desembarco lusófono sexa unha revolución", dixo Eva Mejuto. "Seguimos coa idea de invadilo todo, de encher a cidade en todos os aspectos, de gozar dunha experiencia interesante tanto para nós como para a cultura convidada". A coordinadora do Salón do Libro Infantil e Xuvenil de Pontevedra presentou este luns, xunto á concelleira de Cultura, Carme Fouces, o groso da programación do evento relacionada coa cultura convidada deste ano, o do XX aniversario, que é a lusófona. Unha delegación de 23 escritores, ilustradores e mediadores de lectura, fundamentalmente de Brasil e Portugal, protagonizarán as distintas propostas, entre outras: charlas, obradoiros, exposicións e recitais. Segundo avanzou Fouces, o embaixador de Brasil en España, Pompeu Andreucci Neto, participará na inauguración do evento.
ℹ Saber máis
Información completa do Salón do Libro: www.salondolibro.gal
A escritora Marina Colasanti; os ilustradores André Neves, Ana Biscaia, Afonso Cruz e Roger Mello; a narradora Benita Prieto e o mediador Volnei Canónica son algúns dos convidados do Salón, que se celebrará entre o 22 de marzo e o 12 de abril e que volve apostar por levar a súa programación máis alá do Pazo da Cultura. Así, o Museo de Pontevedra, o cineclub da cidade, as librerías e os locais de hostalaría volverán implicarse a través de distintas propostas.
O Sexto Edificio do Museo repite como sede da exposición central do Salón. Desta vez trátase dunha retrospectiva que repasa o traballo dos ilustradores portugueses máis importantes dos últimos 40 anos. Motim. Movimento de ilustração portuguesa é o título desta mostra, que se une ao resto oferta expostiva en distintos espazos por concretar: Carvoeirinhos, de Roger Mello; Voar, de André Neves; Clube Mediterráneo, de Ana Biscaia, e Portuguesas con M grande, de Cátia Vidinhas.
Polo que se refire á colaboración do Salón do Libro co Cineclub Pontevedra, servirá para que se poidan ver dúas películas: o multipremiado film de animación O menino e o mundo, de Alê Abreu, e o documental Mulleres da Raia, de Diana Gonçalves. Esta última directora visitará a cidade para participar nun cinefórum.
PESSOA PARA BEBÉS. Entre as actividades máis curiosas que o evento está preparando e que Eva Mejuto avanzou este luns están un concerto do cantautor portugués João Afonso (neto de Zeca Afonso); un espectáculo para bebés baseado na poesía de Pessoa e algunhas das propostas que a comunidade brasileira de Pontevedra ofrecerá dentro da programación. Entre outras cousas, o cantautor Gustavo Almeida realizará un obradoiro de música e cancións para nenos; Sérgio Tannus protagonizará unha actuación; o editor Wladimir Vaz falará da escrita e da publicación hoxe, e Amelia Andrade impartirá un obradoiro gastro-literario "que relacionará cociña para crianzas con obras literarias da lusofonía".
Precisamente, como xa pasara o ano pasado con México, a gastronomía estará presente no Salón, no só a través da colaboración cos locais de hostalaría da cidade, senón tamén coa instalación dunha cantina.
Outros espazos
Librerías
As librerías Paz, Seijas e Luna Nueva acollerán actividades e venderán volumes da literatura convidada.
Hostalaría
Máis de 60 establecementos ofrecerán gastronomía dos países convidados. A Taberna do Jazz e Sopa de Gallo acollerán actuacións.
Museo
O Sexto Edificio volverá acoller unha gran exposición da cultura convidada. Neste caso será 'Motim. Movimento de ilustração portuguesa'.
Cineclub
O cineclub colaborará co Salón proxectando 'O menino e o mundo', Alê Abreu, e 'Mulleres da raia', de Diana Gonçalves.