As entradas para o festival SonRías Baixas sairán á venda este luns ás 10 horas, podendo adquirirse a través de www.sonriasbaixas.info.
O evento, que se celebrará do 3 ao 8 de agosto en Bueu, confirmou este xoves un cartel no que, entre outros, destacan Kase.O, La Pegatina, Sés, La M.O.D.A., Travis Birds, ISEO & Dodosound ou Sabela. Ciudad Jara, Muerdo, TéCanela, Tu Otra Bonita e SonDaRúa completan a oferta musical deste festival pontevedrés, que debido ás restricións pola covid-19 reconverterase nun ciclo de concertos ao aire libre.
En agosto de 2022, avanzan os organizadores, recuperarase a edición aprazada o ano pasado pola pandemia, xa co formato habitual do festival. O SonRías Baixas dobrará polo tanto a súa aposta pola celebración de eventos en directo e ampliará a duración da súa programación, que pasará de tres a seis xornadas de concertos, ofrecendo dúas actuacións ao día con todas as medidas de seguridade.
As entradas serán con asentos preasignados e haberá distancias de seguridade entre os asistentes e ata tres tramos diferenciados de prezo, en función da butaca elixida. As entradas do festival SonRías Baixas 2020 terán validez para a edición do 2022, pero o público que dispoña destes abonos poderá solicitar a súa transformación en saldo para adquirir as entradas dos concertos do ciclo deste verán.
