A exposición 100 anos de historias (1916-2016). O monumento a Emilia Pardo Bazán, que a partir deste sábado exhíbese na Coruña, incide na importancia que tivo a autora tanto para dar acceso á cultura a toda a sociedade como para situar ás mulleres en igualdade cos homes.
A apertura coincide co centenario que se conmemora mañá da inauguración na súa cidade natal da escultura que lle rende homenaxe.
A Casa-Museo da escritora abriu, ao pé da escultura, a exposición que constitúe, en palabras do secretario xeral de Cultura, Anxo Lorenzo, "unha homenaxe a unha das grandes plumas de Galicia, a unha pensadora e a unha das grandes ilustres do seu tempo".
"Emilia Pardo Bazán abriu camiños novos, nunha cultura con escasa estima propia e nunha sociedade na que a inmensa maioría das mulleres non eran escolarizadas", engade a través dun comunicado a Xunta.
Durante a súa intervención destacou a intensa relación que sempre mantivo a escritora coa súa cidade natal, tanto no plano persoal como no literario.
Quixo tamén pór en valor a contribución da escritora para enriquecer a cultura galega e a estima dos galegos por ela, tanto "pola súa achega desde a xenialidade da súa escritura" como "pola mensaxe enérxica que enviou en favor dunha sociedade máis igualitaria e máis instruída".
A exposición mostra no Cantón Grande da Coruña, ata o próximo 4 de novembro, o devir do monumento dedicado a Emilia Pardo Bazán e a súa relación coa xente da Coruña, a través de 190 fotografías que achegou a propia cidadanía.
O concelleiro de Culturas da Coruña, José Manuel Sande, destacou que a mostra "permite percorrer de xeito centenario a cidade" cun percorrido vinculado "a unha das súas figuras máis relevantes".