O xogador brasileiro Vinicius Noronha da Silva, do Club Voleibol Teruel, foi atopado morto no seu domicilio este luns pola mañá, segundo confirmou a Efe o presidente da entidade turolense, Carlos Ranera.
Vinicius Noronha, de 26 anos, estaba citado xunto ao resto do persoal para desprazarse á localidade turolense de Alcañiz, onde ía disputar o primeiro partido de pretemporada contra o conxunto castellonenco do L'Illa Grau.
Ante a súa tardanza en acudir membros do club desprazáronse ata a súa casa onde o atoparon morto. O xogador suramericano xogaba no club laranxa desde o ano 2015 e unha vez finalizada a pasada tempada renovou polo club da cidade mudéxar.
Vinicius Noronha foi elixido o mellor xogador da Superliga pasada na súa posición, a de líbero."Non sabemos nada. Atopárono morto na cama e o falecemento ocorreu durante a noite", explicou Carlos Ranera, quen se mostraba abatido pola perda do xogador.
Igualmente o presidente apuntou que Noronha pasara as probas de esforzo que se realizan ao plantel antes de comezar a pretemporada e que nelas non se detectou nada preocupante. "Agora estamos a expensas da autopsia, de falar co consulado de Brasil e coa súa familia", engadiu o dirixente do club turolense.
