O FC Barcelona anunciou este venres un "principio de acordo" cos avogados dos seus xogadores para rebaixar en 122 millóns euros as retribucións fixas desta tempada, ao que hai que engadir "o adiamento", durante tres anos, das remuneracións variables desta campaña, que ascenden a uns 50 millóns de euros.
Este principio de acordo, ao que chegaron este venres os representantes do club e dos xogadores que integran a mesa de negociación, "queda pendente de ratificación nos próximos días por parte do colectivo de xogadores e técnicos afectados", precisa o Barça nun comunicado.
A comisión xestora que dirixe a entidade desde a dimisión de Josep Maria e a súa xunta directiva cifrou en 191 millóns de euros o axuste salarial necesario para resolver o grave problema financeiro que ten o club e que se viu agravado pola pandemia do covid-19.
O FC Barcelona calculou que terá unha redución de ingresos superior aos 300 millóns de euros durante a tempada 2020-21.
