A xunta directiva do Barcelona acordou, na reunión deste luns, "deixar sen efecto" a súa disposición a viaxar a Miami e disputar nesta cidade estadounidense un partido de LaLiga Santander contra o Xirona.
O club tomou esta decisión "logo de constatar a falta de consenso existente ao redor desta proposta", segundo precisou nun comunicado.
O Barcelona, engade, "estaba e está disposto" a desprazarse a Miami para xogar un partido de Liga "e aceptaba que os beneficios se repartisen entre todos os clubs de Primeira e Segunda División, seguindo o mesmo criterio de repartición dos dereitos de televisión". Con todo, considera que mentres non se alcance un acordo entre todos os axentes implicados, este proxecto non pode prosperar".
A proposta de LaLiga de disputar o Xirona-Barcelona en Miami contaba co visto e prace de ambos os clubs, pero non co da Real Federación Española de Fútbol (RFEF) nin o da Asociación de Futbolistas Españois (AFE).
