O capitán do Deportivo, Álex Bergantiños, apoiou a decisión da Audiencia Provincial da Coruña de investigar se os policías que o arrestaron en agosto do ano pasado incorreron en detención ilegal.
O futbolista foi detido en plena rúa o verán pasado pola presunta comisión dun delito de corrupción entre particulares, tras facerse público un audio que enviou a un grupo privado de WhatsApp, cos seus compañeiros de vestiario, sobre o partido aprazado entre o seu equipo e o Fuenlabrada.
"Eu non teño nada que esconder, teño a conciencia tranquila, dixen no seu momento que foi estraño como pasou todo e que investiguen se alguén actuou fóra da lei ou sen respectar os meus dereitos", valorou o xogador coruñés nunha rolda de prensa telemática.
A pesar desas actuacións e de que o Deportivo tamén está personado como prexudicado na causa xudicial que investiga a viaxe do Fuenlabrada a Galicia en xullo do ano pasado con positivos de coronavirus no persoal, o club, co seu novo Consello de Administración, expresou o seu desexo de tender pontes con LaLiga e o seu dirixente, Javier Tebas.
"Estou totalmente de acordo en que o Dépor ten que ter boas relacións cos estamentos do fútbol e que non sexan de fútbol, pero iso non quita que se teña que investigar o que pasou co Fuenlabrada, quen tomo decisións e se hai responsabilidades que acate as consecuencias por se se actuou de mala fe ou vulnerado dereitos", explicou o capitán.
"Creo que son cousas independentes, que teñen que seguir o seu camiño. O Deportivo tense que levar ben con eses estamentos, pero iso non quita que haxa persoas deses estamentos que poidan actuar mal", declarou o xogador branquiazul.
"EXEMPLO DE INTEGRIDADE PERSOAL". Pola súa banda, a alcaldesa da Coruña, Inés Rey, celebrou a decisión da Audiencia Provincial da Coruña para que se investigue a dous axentes de policía.
A rexedora reitera que o vivido na Coruña no caso Fuenlabrada foi unha situación "inaudita e vergoñosa".
"Álex Bergantiños é un exemplo de integridade persoal e de bo facer deportivo e oxalá moitas persoas do mundo do deporte tivesen a súa honestidade e integridade", sinala. A alcaldesa manifesta a súa incredulidade ante o feito de que Bergantiños fose detido por axentes chegados de Madrid.
"Cando as persoas que puxeron en risco a todo un equipo de fútbol e a toda unha cidade, incumprindo os protocolos sanitarios, e que ademais asumiron persoalmente a responsabilidade da viaxe nesas condicións, son as que deberían declarar ante a xustiza e non o capitán do Deportivo".
Rey alega tamén que o goberno local fará todo o posible "para depúrense as responsabilidades do caso Fuenlabrada". Tamén reitera o seu "apoio a Álex Bergantiños e a todo o cadro de persoal do Dépor".
